10:40, 06 Naýryz 2024 | GMT +6
Almaty áýejaıynda Frantsııanyń jalǵan pasportyn kórsetken eki sheteldik ustaldy
ALMATY. KAZINFORM - UQK shekara qyzmeti Qazaqstan aýmaǵyn zańsyz qóshi-qon úshin marshrýt retinde paıdalanýdyń kezekti áreketiniń jolyn kesti.
Aıtalyq, 1 naýryzda Almaty qalasynyń halyqaralyq áýejaıynda shekaralyq baqylaý kezinde Frantsııa Respýblıkasynyń jalǵan qujatyn usynǵan 2 sheteldik azamat ustaldy.
Arnaıy tehnıkalyq quraldardy paıdalana otyryp, olardyń jaramsyzdyǵy rastaldy.
Jalǵan tólqujattar alyndy, sheteldik azamattar deportatsııalandy.
2024 jyldyń basynan shekarashylar ótkizý beketterinde jaramsyz jáne bóten tólqujat paıdalanýdyń 38 faktisiniń jolyn kesti.
UQK shekara qyzmeti jalǵan qujattardy paıdalana otyryp, shekarany buzǵany úshin qylmystyq jaýapkershilik kózdelgenin habarlaıdy.
