Almaty áýejaıynda esirtkige masaıǵan ushqyshqa qatysty qylmystyq is qozǵaldy

ASTANA. KAZINFORM – Almaty qalasynyń áýejaıynda esirtkige masaıǵan Air Astana áýekompanııasynyń ushqyshyna qatysty qylmystyq is qozǵaldy. Bul týraly Іshki ister mınıstriniń orynbasary Aıdos Rysbaev málim etti. 

«Osydan 1 apta buryn iri áýe kompanııanyń ushqyshy ustaldy, ol esirtki qoldanǵan. Jalpy áýe, temirjol, qoǵamdyq kólik tasymaly salasynda qansha adam esirtkige táýeldi? Olardyń tizimi bar ma? Olarmen qandaı jumys júrgizilip jatyr? Naqty nendeı normalardy qarastyryp otyrsyzdar?», - degen suraq qoıdy Májilis depýtaty Juldyz Súleımenova. 

Saýalǵa Іshki ister mınıstriniń orynbasary Aıdos Rysbaev jaýap berdi. 

«Esirtki qoldanyp ustalǵan ushqyshqa qatysty qylmystyq is qozǵaldy. Tergeý amaldary aıaqtalǵannan keıin qosymsha aqparat beremiz. Jalpy ushqyshtar, júrgizýshiler reıske shyǵar aldynda medıtsınalyq tekserýden ótedi», - dedi Aıdos Rysbaev depýtattyń saýalyna jaýap bere otyryp. 

Eske sala keteıik, sáýirde Almaty áýejaıynda esirtkige masaıǵan Air Astana áýekompanııasynyń ushqyshy ustalǵan edi. 

Aıta keteıik, búgin Májilistiń jalpy otyrysynda depýtat Juldyz Súleımenova esirtkiniń QR kod arqyly taralyp jatqanyn aıtty.