Almaty áýejaıynda er adam ózin órtemek boldy

ALMATY. KAZINFORM – Almaty áýejaıynyń ishki termınalynda er adam ózin órteýge tyrysty.

Oqys oqıǵanyń beınejazbasy áleýmettik jelide tarady. 

Kóliktegi polıtsııa departamentiniń málimetinshe, saǵat 22:06-da er adam áýejaı kassasy mańynda ózin-ózi órteýge áreket jasaǵan. Polıtsııa qyzmetkerleri áýejaıdyń qaýipsizdik qyzmetimen birlesip shuǵyl órtti sóndirip, jedel járdem shaqyrǵan. Er adam qalalyq aýrýhanaǵa jetkizildi.

- Atalǵan derek boıynsha Kólik polıtsııasy departamenti qylmystyq is qozǵady. Qazirgi ýaqytta tergeý is-sharalary júrgizilip, oqıǵanyń barlyq sebepteri men mán-jaılary anyqtalyp jatyr, - dep habarlady Kóliktegi polıtsııa departamenti.

Eske salaıyq, bıyl 7 naýryz kúni Almaty áýejaıynda er adam qyzdy kepilge alyp, kópshilik aldynda pyshaq kezendi.

Musa Ábdiraıym kúdiktige ózin kepilge usynyp, qyzmetkerdiń ornyna turǵan. Er adam tártip saqshylarymen kelissózge alańdaǵan tusta ol kúdiktiniń qolyndaǵy pyshaqty julyp aldy.

Bul is boıynsha Mashrapbek Baratov 11 jylǵa bas bostandyǵynan aıyryldy.