Almaty áýejaıynda avtoturaq tarıfi kóterilmeıtin boldy

ALMATY. KAZINFORM — Básekelestikti qorǵaý jáne damytý agenttiginiń Almaty qalasyndaǵy departamenti Almaty halyqaralyq áýejaıyna QR básekelestikti qorǵaý salasyndaǵy zańnamasyn buzýǵa jol bermeý týraly eskertý jasady.

Agenttik málimetine sáıkes, eskertýge Almaty halyqaralyq áýejaıynyń 2025 jyly 1 qańtardan bastap avtoturaq qyzmetine baǵanyń ósetinin habarlaýy sebep bolǵan.

— Monopolııaǵa qarsy organnyń ýaqtyly is-qımylynyń arqasynda Almaty halyqaralyq áýejaıy turaq baǵasyn kóterý josparynan bas tartty. Bul jolaýshylardyń qarjylyq júktemesin jeńildetedi, — dep habarlady Básekelestikti qorǵaý jáne damytý agenttiginen.

Eske salaıyq, byltyr 12 jeltoqsan kúni Almaty halyqaralyq áýejaıy avtoturaq tarıfin kóteretinin habarlaǵan bolatyn.