Almaty áýejaıynda aýa raıyna baılanysty reıster keshigip jatyr

ALMATY. KAZINFORM — Almatyda túngi ýaqyttan beri qalyń qar jaýdy.

Aýa raıyna baılanysty Almaty áýejaıynda ishki jáne halyqaralyq áýe reısteri keshigip jatyr.

Áýejaıdyń onlaın tablosyna sáıkes, túngi reısterdiń kópshiligi keıinge qaldyrylǵan. 

Qazir shyǵýy keshigip jatqan reıster qatarynda: Almaty — Dýbaı, Almaty — Qaraǵandy, Almaty — Óskemen, Almaty — Astana reısteri bar.

Eske salaıyq, 10 jeltoqsan tańǵy 07:00–degi málimet boıynsha Almatyda qardyń qalyńdyǵy 35 santımetrge jetip, aılyq normanyń jartysyna jýyqtady.

Qalany qardan tazalaýǵa 2 728 jumysshy men 75 jedel brıgada tartyldy. Qala kóshelerine 923 arnaıy tehnıka shyqty, sonyń ishinde 228 qurama jol mashınasy kóktaıǵaqty boldyrmaý maqsatynda arnaıy qospa sebýge kiristi. Tehnıkalardyń júrisin qamtamasyz etý úshin 22 polıtsııa ekıpajy, sondaı-aq 10 evakýator men manıpýlıator jumyldyryldy.

Odan bólek qar men kóktaıǵaq saldarynan Almatyda bir túnde 58 jol-kólik oqıǵasy bolǵanyn jazǵanbyz.