Almaty áýejaıynda 6,8 mlrd teńge kóleminde dıvıdendter zańsyz tólengen
ALMATY. KAZINFORM — QR Qarjy mınıstrligi Іshki memlekettik aýdıt komıteti profılaktıkalyq baqylaý barysynda Almaty halyqaralyq áýejaıynyń qarjylyq qyzmetinde kemshilikterdi anyqtady.
Vedomstvonyń málimetinshe, júrgizilgen tekserý kezinde aktsıoner bolyp eseptelmeıtin zańdy tulǵaǵa 6,8 mlrd teńge somasyna dıvıdendterdiń zańsyz tólengeni áshkerelendi.
— Bul strategııalyq nysannyń aktıvteri men damý múmkindikterin tómendetip, onyń qarjylyq turaqtylyǵyna áser etti. Tekserý nátıjeleri boıynsha tıisti qarajat áýejaıdyń shotyna tolyǵymen qaıtaryldy. Atalǵan aqsha Almaty halyqaralyq áýejaıyn damytyp, jolaýshylarǵa qyzmet kórsetý sapasy men basqa da servısterdi jaqsartýǵa baǵyttalady, — delingen habarlamada.
QR QM Іshki memlekettik aýdıt komıtetiniń tóraǵasy Erjan Myńjasarovtyń aıtýynsha, 2025 jyly engizilgen tyń tásilderdiń arqasynda baqylaý organy jappaı tekserýdiń ornyna ataýly túrdegi jumysqa basymdyq bergen.
Jalpy tekserýler 22% qysqaryp, anyqtalǵan buzýshylyqtar somasy 36% ulǵaıǵan. 2025 jyldyń qorytyndysy boıynsha bıýdjetke 400 mlrd teńge qaıtarylyp, sondaı-aq 1,2 mlrd teńge kóleminde aıyppul óndirildi.
Eske salaıyq, buǵan deıin Túrkistandaǵy halyqaralyq áýejaıdy senimgerlik basqarýǵa berý máselesi boıynsha kelissózder jalǵasyp jatqanyn jazǵanbyz.
Oblystyq jolaýshylar kóligi jáne avtomobıl joldary basqarmasy qazirgi tańda áleýetti ınvestormen dıalog júrgizilip jatqanyn málim etti.