Almaty áýejaıynda 33 telefon urlaǵan júk bóliminiń qyzmetkeri sottaldy

ALMATY. KAZINFORM – Almatyda qyzmettik jaǵdaıyn paıdalana otyryp qymbat telefondardy urlaǵan er adam jazalandy.

Kóliktegi polıtsııa departamentiniń málimetinshe, 27 jastaǵy azamat bıyl 15 qyrkúıekte ustalǵan. Ol áýe kompanııalardyń biriniń júk bóliminde jumys istep, bıyl mamyr jáne shilde aılary aralyǵynda Stambuldan kelgen smartfondardy júıeli túrde urlap otyrǵan.

– Jalpy 33 mobıldi telefon urlanǵany anyqtaldy. Keltirilgen zalaldyń jalpy somasy - 7 664 315 teńge. Sotqa deıingi tergeý barysynda zalal tolyq kólemde óteldi. Almaty qalasy Túrksib aýdandyq sotynyń úkimimen aıyptalýshy kináli dep tanylyp, 2 jyl 6 aı merzimge bas bostandyǵynan aıyryldy, - dep habarlady departamentten.

Eske salaıyq, buǵan deıin Almaty áýejaıynda «bagajymda bomba bar» degen sheteldik jolaýshy ustalǵanyn jazǵanbyz.