Almaty áýejaıyna jańa halyqaralyq áýe kompanııalary kele bastady

ALMATY. KAZINFORM – «QazMunaıGaz-Aero» JShS birqatar sheteldik áýe kompanııamen Almaty halyqaralyq áýejaıynda áýe kemelerin avıaotynmen qamtamasyz etý jóninde kelisimsharttarǵa qol qoıdy.

Kompanııa málimetinshe, yntymaqtastyqtyń keńeıýine avıaotyn baǵasynyń tómendeýi, sondaı-aq eldiń basty avıatsııalyq habyndaǵy qyzmet kórsetý jaǵdaılarynyń básekege qabiletti bolýy yqpal etken.

– Jańa kelisimder halyqaralyq áýe tasymaldaýshylarynyń Almaty áýejaıyna qyzyǵýshylyǵy artyp kele jatqanyn kórsetedi. Sonymen qatar bul áýejaıdyń Azııa, TMD jáne Eýropa elderi arasyndaǵy jolaýshylar jáne júk tasymaly baǵytynda óńirlik hab retindegi rólin kúsheıte túsedi, - delingen habarlamada.

QMG-Aeronyń jańa seriktesteri qatarynda:

• SpaceBee Airlines – júk tasymalyna mamandanǵan Ózbekstannyń jańa halyqaralyq áýe kompanııasy;

• AZAL Azerbaijan Airlines – Ázerbaıjannyń ulttyq áýe tasymaldaýshysy;

• My Freighter Airlines – Tashkentte ornalasqan, Eýropa, Azııa jáne Taıaý Shyǵys baǵyttarynda halyqaralyq júk tasymalyn júzege asyratyn ózbek áýe kompanııasy;

• Easy Charter – Grýzııanyń Tbılısı qalasynda ornalasqan charterlik júk áýe kompanııasy, Eýropa, Azııa, Taıaý Shyǵys jáne TMD elderine júk reısterin uıymdastyrady.

Kompanııa ókilderiniń aıtýynsha, halyqaralyq áýe trafıgin arttyrý jáne otynmen qamtamasyz etý úshin qolaıly jaǵdaı jasaýǵa baǵyttalǵan áýejaılar men avıaotyn jetkizýshiler arasyndaǵy seriktestik alǵashqy nátıjesin bere bastaǵan. Bul óz kezeginde Qazaqstannyń avıatsııa naryǵyn odan ári damytýǵa yqpal etedi.

Eske salaıyq, buǵan deıin Almaty áýejaıy Ortalyq Azııadaǵy alǵashqy arnaıy muzdanýǵa qarsy óńdeý alańyn iske qosqan edi.