Almaty áýejaıyna kirý tártibi ózgerdi
ALMATY. KAZINFORM – Almaty áýejaıyna kirý negizgi kireberis aýmaǵyn jańǵyrtýǵa baılanysty ýaqytsha ózgertildi.
Almaty áýejaıy baspasóz qyzmetiniń málimetinshe, bul jumystar ınfraqurylymdy jaqsartý jáne qolaılylyqty arttyrý maqsatynda júrgizilip jatyr.
Endi áýejaı aýmaǵyna kirý Ahmetova kóshesi boıymen, Aqsuńqar qonaq úıiniń aldyndaǵy 3-kireberis arqyly júzege asyrylady. Al áýejaı aýmaǵynan burynǵydaı Maılın kóshesi arqyly shyǵýǵa bolady.
– Áýejaıǵa keler kezde ýaqytyńyzdy aldyn ala josparlaýyńyzdy suraımyz. Sebebi qarbalas ýaqytta keptelis týyndaýy múmkin, - dep eskertti áýejaıdyń baspasóz qyzmeti.
Áýejaı qonaqtarynyń áýejaıǵa kirý kezinde qosymsha suraqtary nemese máseleleri týyndaǵan jaǵdaıda, + 7 777 009 90 68 baılanys nómirine habarlasyp, sondaı-aq áýejaı aýmaǵynda júrgen arnaıy forma kıgen qyzmetkerlerden kómek suraı alady.
Eske salaıyq, buǵan deıin 21 mamyrdan bastap Astana áýejaıynyń vokzal mańy men kireberis jolynda jol jóndeý jumystary júrgiziletinin jazǵanbyz.
