Almaty áýejaıyn basyp alý isi: Advokattar sot ǵımaratyna kúshpen kirmek boldy

Búgin Almatyda Qańtar oqıǵasy kezinde áýejaıdy basyp alý isi boıynsha sot tyńdaýy ótýi kerek edi. Alaıda protseske sottalǵandardyń advokattary kedergi keltirdi, dep habarlaıdy QazAqparat tilshisi.

«Sot otyrysy onlaın rejımde ótkiziledi dep josparlanǵan, bul jóninde protseske qatysýshylarǵa aldyn ala habarlandy. Alaıda, osyǵan qaramastan, birneshe advokat qalalyq sot ǵımaratyna oflaın otyrys ótkizýdi talap etip keldi. Tártipti buzyp, sot ǵımaratyna kúshpen kirýge tyrysyp, sottalǵandardyń advokattary protseske qosylmady, osylaısha tyńdaýdyń ótkizilýine kedergi keltirdi», - dep málim etti qalalyq sottan.

Atap ótilgendeı, qorǵaýshy tarap osy áreketteri arqyly ózderine senim bildirgenderdiń quqyǵyn saqtaýdy qamtamasyz ete almady. Osyǵan baılanysty sot alqasy qalalyq advokattar alqasynyń atyna protsesti buzǵan tulǵalarǵa qatysty jeke qaýly joldaý týraly sheshim qabyldady.

«Otyrysty onlaın ótkizý týraly sheshim birinshi ınstantsııadaǵy sotta sottalýshylardyń týystary, sondaı-aq basqa qatysýshylar sot tyńdaýynyń qalypty sıpatta júrýine kedergi keltirip, agressıvti is-áreket jasaýyna baılanysty qabyldanǵan bolatyn. Olardyń osyndaı is-áreketi saldarynan sot zalyndaǵy múlik búlindi. Sonymen qatar bul áreketter sottaǵy parallel protsesterge de kedergi keltirdi», - dep atap ótti qalalyq sottyń baspasóz qyzmetinen.