Almaty áýejaıy jóndeý jumystaryna baılanysty jolaýshylarǵa úndeý jasady
ALMATY. KAZINFORM – Almaty áýejaıynyń halyqaralyq termınalynda jóndeý jumystary júrgizilip jatyr.
Megapolıs áýejaıynyń málimetinshe, 10 kún boıy T2 termınalynyń ushý qabatynda, pasporttyq baqylaý aımaǵyna jaqyn jerde, ǵımarat tóbesinde jóndeý júredi. Jumystar tańǵy 9:00-den keshki 19:00-ge deıin júrgizilmek.
– Ýaqytsha qolaısyzdyqtar úshin keshirim suraımyz. Atalǵan jumystar – termınaldyń jaılylyǵyn arttyrýǵa baǵyttalǵan josparly sharalardyń bóligi. Jol júrýdi josparlaý kezinde osy aqparatty eskerýińizdi suraımyz, sebebi qarbalas saǵattarda kezekter paıda bolýy múmkin, - dep habarlady áýe aılaǵynyń baspasóz qyzmeti.
Eske salaıyq, Almaty áýejaıynyń jańa termınaly 2024 jyldyń 1 maýsymynda iske qosyldy. Alǵashqy reıs retinde London-Almaty baǵyty boıynsha ushqan áýe kemesi kelip qondy.
Buǵan deıin Almaty áýejaıynyń ishki termınalynda jóndeý jumystary júrip jatqanyn jazǵanbyz. Olar bıyl shilde aıynda aıaqtalýy tıis.
