Almaty áýejaıy órt qaýipsizdigi talaptaryn buzǵany úshin aıyppul tóledi
ALMATY. KAZINFORM – Almatynyń ákimshilik quqyq buzýshylyqtar jónindegi mamandandyrylǵan aýdanaralyq soty «Halyqaralyq Almaty áýejaıy» AQ-ǵa aıyppul saldy.
Sot áýe aılaǵyn 2025 jylǵy 11 qarashada Túrksib aýdandyq tótenshe jaǵdaılar basqarmasy bergen nusqamany oryndamaǵany úshin jaýapkershilikke tartty.
Tekserý kezinde konteınerler jaqyn mańdaǵy ǵımarattardan 18 metrden az qashyqtyqta ornalastyrylǵany, T-2 termınalynyń ishki jospary ózgertilip, bul avtomatty órt dabyly men órt sóndirý júıleleriniń áreket etý aımaǵyn shektegen.
Alaıda áýejaı belgilengen merzimge deıin bul kemshilikterdi túzetpegen.
Sot áýejaıǵa 500 AEK aıyppul saldy. Áýejaı jumysyn toqtatý sharasy qoldanylǵan joq, óıtkeni munyń aıtarlyqtaı áleýmettik-ekonomıkalyq saldary bolýy múmkin.
— «Halyqaralyq Almaty áýejaıy» AQ Ákimshilik quqyq buzýshylyq týraly kodekstiń 462-babynyń 3-bóligi boıynsha 2 162 500 (eki mıllıon júz alpys eki myń bes júz) teńge kóleminde aıyppul tóleıdi, — delingen sot qaýlysynda.
Qaýly zańdy kúshine endi.
Eske salaıyq, buǵan deıin Almaty áýejaıynda 6,8 mlrd teńge kóleminde dıvıdendter zańsyz tólengenin habarlaǵan edik.