Almaty áýejaıy aýyr halde kelgen jolaýshyǵa nege jedel járdem qyzmetin jibermedi

ALMATY. KAZINFORM – Almaty halyqaralyq áýejaıy Delıden aýyr halde kelgen jolaýshyǵa qatysty túsinikteme berdi.

12 qańtar kúni Delıden Almatyǵa ushyp kelgen jolaýshyǵa zembil men medıtsınalyq kómek qajet boldy. Ony áýejaı qyzmetkerleri qajetti qural-jabdyqtarmen kútip turǵan. Alaıda aldyn ala ruqsatsyz qaladan jedel járdem kóligi jetken.

Azamattyq avıatsııadaǵy jolaýshylarǵa medıtsınalyq kómek kórsetý qaǵıdalaryna sáıkes, jedel járdem perronǵa jiberilmedi.

– Halyqaralyq hattamalarǵa sáıkes, eger jolaýshynyń medıtsınalyq problemalary bolsa, áýe kompanııa arnaıy kodtarmen habarlaý arqyly osyndaı jolaýshy bortta bar ekendigi týraly áýejaıǵa habarlaıdy. Halyqaralyq standarttarǵa sáıkes, bul jolaýshylardyń birneshe sanaty bar. Áýe kompanııadan STCR kody jiberildi (jolaýshyǵa zembil qajet). Almaty halyqaralyq áýejaıy tarapynan jolaýshy bortynyń ushýy boıynsha STCR arnaıy tehnıkasy bar komanda kútip turdy, – dep habarlady áýejaıdan.

Áýejaı qyzmetkerlerine medıtsınalyq brıgadasy bar bógde reanımobıldiń qaladan áýejaı aýmaǵyna kelý qajettiligi týraly aldyn ala habarlanǵan joq. Reanomobıl sol ýaqytta jáne áýejaı qyzmetteriniń kelisiminsiz keldi.

– Bógde kólikti perronǵa jiberý úshin belgili bir kelisý rásimderi bar. Ol úshin reıste kele jatqan jolaýshy týraly aqparat, onyń dıagnozy jáne basqa da mańyzdy málimetter reısten keminde 24 saǵat buryn nemese áýe kemesi qonǵanǵa deıin 2 saǵat buryn usynylýy kerek. Bul aqparat usynylǵan joq, – delingen habarlamada.

STCR komandasynyń qyzmetkerleri jolaýshynyń jaǵdaıyn kórip, áýejaıdyń medıtsınalyq qyzmeti men jedel járdem kóligin shaqyrdy.

Jolaýshyny alyp júrýshiler áýejaıdyń jedel járdem kóligimen barýdan bas tartty, sonyń saldarynan jolaýshy shekaralyq baqylaý aımaǵyna jetkizildi. Jolaýshy shekaralyq jáne kedendik baqylaýdan áýejaı qyzmetiniń súıemeldeýimen kezeksiz, qozǵalýy shekteýli jolaýshy retinde ótti.

– Baqylaýdan ótken sátte jolaýshylar arasynda jaǵdaıy aýyr jáne erekshe medıtsınalyq qajettilikteri bar balanyń bolýy týraly aqparat áýejaıda bolǵan joq. Áýejaı qyzmetkerleri belgilengen protsedýralar men erejelerge sáıkes qatań túrde áreket etti. Almaty halyqaralyq áýejaıy balanyń tez saýyǵyp ketýine tilektes. Biz jolaýshylar úshin, ásirese erekshe qoldaýdy qajet etetinder úshin qolaıly jaǵdaı jasaýdyń mańyzdylyǵyn túsinemiz. Áýejaıda qozǵalýy shekteýli jolaýshylarǵa, sonyń ishinde syrqattary aýyr jolaýshylarǵa arnalǵan súıemeldeý qyzmeti jumys isteıdi. Bul qyzmetti alý úshin áýe kompanııaǵa nemese áýejaıǵa aldyn ala habarlaý qajet, – dep túsindirdi áýejaıdan.

Osyǵan deıin Almaty áýejaıynda túkirgen sheteldikke aıyppul salynyp, reısten túsirildi. 

Sondaı-aq Almaty halyqaralyq áýejaıynyń prezıdenti Goker Kose ushaq bıletteriniń qymbattyǵyna qatysty túsinik bergen edi.