Almaty áýejaıy 10 mıllıonynshy jolaýshyny qarsy aldy
ALMATY. KAZINFORM — Almaty halyqaralyq áýejaıy 10 mıllıonynshy jolaýshyny qarsy aldy. Bul Almaty áýejaıy men qala úshin tarıhı oqıǵa.
Sátti sannyń ıesi Shymkentten Almatyǵa jol tartqan 47 jastaǵy Sholpan Sadyqova boldy. Oǵan tarıhı oqıǵanynyń qurmetine Almaty áýejaıy Grýzııaǵa eki adamǵa joldama syılady.
— Men Almaty qalasynyń turǵynymyn, jasym 47-de. Ata-anamdy Saryaǵashqa demalýǵa aparyp, qaıtyp kele jatqan edim. Kútpegen jerden osyndaı tosyn syıǵa ıe bolyp otyrmyn. Endi Grýzııaǵa anammen birge barsam deımin, — dedi jolaýshy.
Al Almaty áýejaıynyń prezıdenti Goker Kose bıyl áýejaı 11 mıllıonynshy jolaýshyny qarsy alýy múmkin ekenin atap ótti.
— Búgin biz áýejaı men qala tarıhynda alǵash ret 10 mıllıonynshy jolaýshyny qabyldadyq. Bul jolaýshy avtomatty júıe arqyly anyqtaldy jáne bul Shymkent qalasynan kele jatqan azamat. Jalpy Almaty halyqaralyq áýejaıynda jolaýshylar aǵyny ósip keledi. Oǵan salynǵan ınvestıtsııalar men jańa termınaldyń ashylýy áser etýde. Bıyl jolaýshylar sany 11 mln jetedi dep oılaımyz. Áýejaıda 20 mıllıonynshy jolaýshy qabyldaıtyn kúnniń aýyly da alys emes, — dedi Almaty áýejaıynyń prezıdenti Goker Kose.
Almaty áýejaıynyń málimetine sáıkes, sońǵy úsh jylda áýe baǵyttardyń sany eki ese jáne Almatyǵa ushatyn áýekompanııalar sany 24-ten 37-ge deıin ósken. 2024 jyldyń toǵyz aıynda jolaýshylar aǵyny 8,5 mıllıon adamǵa jetti. Al jańa Halyqaralyq jolaýshylar termınalynyń iske qosylýymen áýejaıdyń ótkizý qabileti 14 mln jolaýshyǵa deıin kóbeıdi.
Eske salaıyq, buǵan deıin bıyl 1 maýsym kúni Almaty halyqaralyq áýejaıynyń jańa termınaly alǵashqy reısterdi qabyldady.
Keıin Almaty áýejaıynyń prezıdenti Goker Kose áýejaıǵa taǵy 100 mln dollar ınvestıtsııa salynatynyn aıtty.
Ótken aptada Almaty áýejaıynyń eski jáne jańa termınaly arasynda kópir ashyldy.
