Almatyda kólikterge arnalǵan shekteý týraly ne belgili
ALMATY. KAZINFORM – Almaty aýasyn tazartýdyń jańa erejeleri ázirlendi. Joba Ashyq NQA saıtynda talqylandy. Keıin Almaty qalasynyń ákimdigi atmosferalyq aýany qorǵaý qaǵıdalarynyń jobasyna qatysty qosymsha túsinikteme berdi.
Jańa erejelerge sáıkes, qalada tómen shyǵaryndylar aımaqtaryn (Low Emission Zones, LEZ) qurý josparlanǵan. Mundaı aımaqtarda ekologııalyq klasy tómen avtokólikterdiń qozǵalysyna shekteý qoıylady jáne ol aqyly bolady. Qala ákimdigi joba qazan aıynan bastap pılottyq rejımde aldymen ortalyq kóshelerde iske qosylatynyn habarlaǵan edi.
Osy oraıda, Kazinform agenttigi jaýapty organdardan jańa erejelerdi synaý jumystarynyń bastalýy týraly surady. Almaty qalasynyń ekologııa jáne qorshaǵan orta basqarmasynyń jaýabyna sáıkes, LEZ — tómen shyǵaryndylar aımaqtary pılottyq joba retinde ázirge iske qosylǵan joq.
— LEZ jobasy boıynsha qala aýmaǵy naqty aýdandarǵa nemese kóshelerge bólinbeıdi. Tómen shyǵaryndylar aımaǵy búkil Almaty qalasyn qamtıdy. Bul sheshim qalanyń oıystaý jer bederimen baılanysty, sebebi shyǵaryndylar bir jerde paıda bolsa da, aýa aınalymynyń áserinen búkil qalaǵa taraıdy. Sondyqtan barlyq aýmaqqa birdeı ekologııalyq talaptar qoldanylady, — dep habarlady vedomstvo.
Sondaı-aq ekologııa basqarmasy tómen shyǵaryndylar aımaqtaryn tolyq formatta engizý pılottyq rejımniń qorytyndylaryna sáıkes kezeń-kezeńmen júzege asyrylýy múmkin ekenin málimdedi. Alaıda pılottyq jobanyń ózi qashan iske qosylatynyn naqtylaǵan joq.
— Osy maqsatta LEZ aımaqtaryn engizý boıynsha is-sharalar josparyn Jol kartasy arqyly iske asyrý kózdelgen. Pılottyq rejım nátıjelerin taldaý qorytyndysy boıynsha tómen shyǵaryndylar aımaqtaryna kirýdiń aqyly júıesi birtindep engiziledi. Sonymen qatar qala turǵyndary men jumysy nemese oqýy turaqty túrde qala aýmaǵynda ornalasqan tulǵalar úshin abonementtik júıe qarastyrylǵan, — delingen vedomstvo jaýabynda.
Eske salaıyq, buǵan deıin Almatyda otshashýǵa tyıym salynyp, avtokólikter úshin aqyly aımaqtar engizilýi múmkin ekenin jazǵanbyz.
Sondaı-aq Almatyda aýany tazartý úshin qandaı sharalar qoldanylatynyn jazǵanbyz.