«Almaty aportyn» saqtap qalýdyń jańa múmkindigi paıda boldy
ASTANA. KAZINFORM — Qazaqstandyq ǵalymdar alma aǵashtaryn bakterııalyq kúıikten qorǵaýǵa arnalǵan otandyq «Laktın AS» jáne «Plantarın AS» bıologııalyq preparattaryn óndiristik jaǵdaıda synaqtan ótkizdi, dep habarlaıdy AShM baspasóz qyzmeti.
Almaty, Jambyl jáne Túrkistan oblystaryndaǵy jalpy aýmaǵy 500 gektarǵa deıingi alma baqtarynda júrgizilgen synaqtar qorǵaý quraldarynyń tıimdiligin kórsetti. Alma aǵashtaryn keshendi qorǵaý júıesiniń tıimdiligi óndiristik jaǵdaıda 92 paıyzǵa, al shaǵyn ýchaskelerde júrgizilgen tájirıbelerde 95 paıyzǵa deıin jetti.
Bıologııalyq quraldardy J. Jıembaev atyndaǵy Qazaq ósimdik qorǵaý jáne karantın ǵylymı-zertteý ınstıtýtynyń ǵalymdary Mıkrobıologııa jáne vırýsologııa ınstıtýtynyń mamandarymen birlesip, sút qyshqyldy bakterııalar negizinde ázirledi. Qazaq ósimdik qorǵaý jáne karantın ǵylymı-zertteý ınstıtýtynyń mamandary preparattardy óndiristik jaǵdaıda synaqtan ótkizip, olardy qoldaný tásilderin jetildirdi. Sondaı-aq sharýashylyqtarda júrgizilgen tájirıbeler arqyly alma baqtaryn qorǵaý júıesiniń tıimdiligin baǵalady.
— Synaq nátıjeleri boıynsha Túrkistan oblysynda alma aǵashtaryn aýrýdan qorǵaý tıimdiligi 90-92 paıyzǵa jetip, ónimdilik ár gektardan 2 tonnadan astam artty. Almaty oblysynda bakterııalyq kúıikke beıim «Aport» sorty boıynsha qorǵaý tıimdiligi 84 paıyzǵa deıin jetti. Bul óńirde ónimdilik ár gektardan 1,5-2 tonnaǵa artty, — deıdi mamandar.
«Aport» sortyna júrgizilgen jekelegen zertteýler de oń nátıje kórsetti. Bıologııalyq preparattardy eki ret qoldanǵannan keıin bakterııalyq kúıiktiń taralýy men damý deńgeıi shamamen segiz ese tómendegen.
Jańa ázirlemeniń mańyzdy tustarynyń biri — bakterııalyq kúıikke beıim tarıhı «Almaty aporty» sortyn saqtaýǵa úles qosý múmkindigi. Otandyq bıologııalyq preparattar alma aǵashtaryn qorǵaýdyń jeke quraly retinde ǵana emes, bıologııalyq ádister men ózge de fıtosanıtarııalyq sharalardy ushtastyratyn keshendi qorǵaý júıesiniń quramdas bóligi retinde qoldanylady.
Synaq nátıjeleri otandyq ǵalymdar ázirlegen bıologııalyq preparattardyń jemis aǵashtaryn qorǵaýdaǵy áleýetin kórsetti. Bul jumys Qazaqstanda ósimdikterdi bıologııalyq jolmen qorǵaý tehnologııalaryn damytýǵa jáne otandyq ǵylymı ázirlemelerdi aýyl sharýashylyǵy óndirisine keńinen engizýge múmkindik beredi.
Buǵan deıin BUU Almaty aportynyń dańqyn qaıtarýǵa qoldaý kórsetetinin jazǵanbyz.
