Almaty aportyn brend retinde tirkeýge keminde jarty jyl ýaqyt ketýi múmkin

Ádilet mınıstri Azamat Esqaraev BAQ ókilderimen ótken brıfıngide Almaty aportyn brend retinde tirkeýge keminde jarty jyl ýaqyt ketýi múmkin ekenin málim etti, dep habarlaıdy Kazinform agenttigi.

«Almaty aporty týraly Ortalyq kommýnıkatsııalar qyzmetinde aıtqan edim. Qazir Ádilet mınıstrligi bul jumysty qolǵa alyp, Almatydaǵy qaýymdastyqpen osy jumysty iske asyryp jatyr. Bizge olar tirkeý týraly aryz jibergen. Ol Almaty aportyn Qazaqstannyń geografııalyq kórsetkishi retinde bekitýge qatysty. Bul jumys júrgizilip jatyr», - dedi Azamat Esqaraev.

Aıtýynsha, bul sharýaǵa keminde 4 aı ýaqyt ketýi kerek.

«Keıin ony biz Qazaqstanda, ıaǵnı, óz júıemizde tirkep, tıisti qujattardy jınap, halyqaralyq deńgeıde tirkeý boıynsha jumystardy júrgizemiz. Almaty aportyn Qazaqstannyń geografııalyq kórsetkish retinde tirkeý ýaqytty talap etedi. Sebebi, jumys kezeń-kezeńimen júrgiziledi. Onda bıýrokratııalyq, salalyq suraqtar bar. Jumys halyqaralyq deńgeıde júrgiziledi. Sondyqtan biz qujattardy jınap, qaraýǵa tolyq paketti engizemiz. Kem degende jarty jyl kerek. Ony biz World Intellectual Property Organisation-ǵa (WIPO-red), Dúnıejúzilik zııatkerlik menshikti qorǵaý uıymynyń atyna jiberemiz», - dedi mınıstr.