Almaty ákiminiń taǵy bir orynbasary taǵaıyndaldy
ALMATY. KAZINFORM — Almashan Smatlaev Almaty ákiminiń orynbasary bolyp taǵaıyndaldy.
— Almaty ákimi Darhan Satybaldynyń ókimimen jáne Qazaqstan Respýblıkasy Prezıdenti Ákimshiliginiń kelisimi boıynsha 2025 jyly 18 tamyzda Almaty qalasy ákiminiń orynbasary bolyp Almashan Smatlaev taǵaıyndaldy, — delingen habarlamada.
Ol ekologııa, energetıka, kólik jáne kommýnaldyq sharýashylyq máselelerine jetekshilik etedi.
Almashan Smatlaev Reseı Federatsııasyndaǵy Qarjy ýnıversıtetin «ekonomıka» jáne «memlekettik jáne mýnıtsıpaldyq basqarý» mamandyqtary boıynsha, sondaı-aq, AQSh-taǵy Blýmsberg ýnıversıtetin «halyqaralyq ekonomıka» mamandyǵy boıynsha támamdaǵan.
Eńbek jolyn 2009 jyly bıznes qurylymdarda bastap, keıin Eýrazııalyq ekonomıkalyq komıssııada jumys istedi.
2014-2023 jyldar aralyǵynda Shyǵys Qazaqstan oblysynda ekonomıka jáne bıýdjettik josparlaý basqarmasyn basqardy, oblys ákiminiń orynbasary, keıin birinshi orynbasary syndy ártúrli laýazymda qyzmet atqardy.
Búginge deıin Qazaqstan Respýblıkasy Prezıdenti Ákimshiliginiń memlekettik ınspektory bolyp eńbek etken.
Eske salaıyq, buǵan deıin Almaty ákiminiń orynbasarlary Álisher Ábdiqadyrov, Ásem Núsipova, Asqar Amrın qyzmetinen ketken edi.
2025 jylǵy 19 maýsymda Almaty ákiminiń orynbasary laýazymyna Oljas Smaǵulov taǵaıyndaldy.