Almaty ákiminiń orynbasaryna aıyppul salyndy

ALMATY. KAZINFORM - Túrksib aýdanynyń prokýratýrasy kásipkerlik sýbektilerin zańsyz teksergen ákimdiktiń laýazymdy tulǵalaryn jaýapqa tartty.

Almaty prokýratýrasynyń málimetinshe, qala ákimi orynbasarynyń tapsyrmasy boıynsha áleýmettik mańyzy bar azyq-túlik taýarlarynyń baǵasyna monıtorıng júrgizý barysynda aýdan ákimdikteriniń qyzmetkerleri óz ókilettikteriniń sheginen shyǵyp kásipkerlerden qujattardy zańsyz negizde usynýdy talap etken.

- Mundaı áreketter zańnamaǵa qaıshy keledi, sebebi tekserýshilerde bıznesten qujattamany talap etý úshin quqyqtyq negizder bolmaǵan. Tekserý júrgizý tártibin buzý faktileri boıynsha aýdan ákimderi apparattarynyń 6 laýazymdy tulǵasy QR ÁQBtK-niń 175-babymen ákimshilik jaýaptylyqqa tartyldy. 25 materıal boıynsha 500 AEK mólsherinde aıyppul salyndy, - dep habarlady prokýratýra.

Budan basqa Almaty qalasy ákiminiń orynbasaryna QR ÁQBtK-niń 173-babymen kásipkerlik qyzmetke zańsyz aralasqany úshin 100 AEK mólsherinde aıyppul salynǵan.

- Qazirgi ýaqytta barlyq aıyppul qysqartylǵan tártippen tólendi, - dep habarlady prokýratýra.

Eske salaıyq, buǵan deıin Almaty prokýratýrasy sheshimimen áýejaıǵa salynǵan 122 mln teńge aıyppul zańsyz dep tanylǵanyn jazǵanbyz.