Almaty ákimdigi jol jóndeýde qatelikter jibergen merdigermen kelisimshartty buzdy
Almaty ákimdigi eskertýsiz jol belgilerin alyp tastap, kólik pen jaıaý júrginshilerge qaýip týyndatqan merdiger kompanııamen kelisimshartty toqtatty, dep habarlaıdy Kazinform.
Qalalyq mobıldilik basqarmasy «Dauren Build» JShS-men Baızaqov kóshesiniń Tımırıazev kóshesinen Raıymbek dańǵylyna deıingi bóligine ortasha jóndeý jumystaryn júrgizý boıynsha talaptardyń buzylýyna baılanysty kelisimshartty buzýǵa nıetti ekendigin rastaıtyn eskertý joldady.
«Qazirgi kezde atalǵan nysan boıynsha jóndeý jumystary tapsyrys berýshiniń kelisiminsiz jıyrma kúnge toqtatqan. Basqarma tarapynan jóndeý jumystaryn jandandyrý jóninde birneshe eskertý joldandy. Alaıda merdiger uıym jumystarǵa tek qazan aıynda qaıta kiristi.Sonymen qatar tehnıkalyq qadaǵalaý tarapynan de eskertýler berilgenmen, merdiger uıym bul qatelikterdi jóndemedi»,-dep habarlady basqarmadan.
Sondaı-aq Baızaqov kóshesiniń Gogol kóshesinen Raıymbek dańǵylyna deıingi bóliginiń betki qabaty 24 tamyz kúni tapsyrys berýshige eskertýsiz tıisti jol belgilerimen birge qyryp tastaldy. Osylaısha, qazirgi kezde atalǵan kósheniń atalǵan bóligi kólik pen jaıaý júrginshiler úshin qaýip týyndatyp otyr.
«Kelisimshart talaptaryna sáıkes, tapsyrys berýshi ekinshi taraptyń óreskel qatelikterine baılanysty kelisimshartty bekitilgen merziminen buryn buzýǵa quqyly. Kelisimshart talaptaryn buzýdyń qatarynda tapsyrys berýshiniń kelisiminsiz jumystardy on bes kúnnen uzaq toqtatý da bar.Jol qaýipsizdigi men qala turǵyndarynyń jaılylyǵyn qamtamasyz etý maqsatynda basqarma qoldanystaǵy zańnama aıasynda shara qoldanady. Memlekettik satyp alýlar týraly zańǵa sáıkes tapsyrys berýshi tarapynan kelisimshartty birjaqty buzý týraly eskertý joldanydy, sonymen qatar aıyppul da qarastyrylǵan»,-dep atap ótti Almaty qalalyq mobıldilik basqarmasynan.
Kólik qozǵalysynyń jıiligin eskere otyryp jáne apattyq jaǵdaılardy aldyn alý maqsatynda Gogol kóshesinen Raıymbek dańǵylyna deıingi bóliktiń ortasha jóndeý jumystaryn kásiptiń áleýmettik jaýapkershiligi aıasynda ózge merdiger uıymdar aıaqtaıtyn bolady.
Eske sala keteıik, bıyl ortasha jóndeý jumystaryn jalpy uzyndyǵy 200 shaqyrym jolda júrgizý josparlanǵan bolatyn. Qazirgi kezde negizgi magıstraldy kósheler boıynsha jumystar aıaqtaldy.
Injenerlik jelilerdi uıymdastyrý jumystary ýaqtyly aıaqtalǵan jaǵdaıda, aýdandyq mańyzy bar joldardaǵy jóndeý jumystaryn qarasha aıynyń sońyna deıin aıaqtaý josparlanyp otyr. Osylaısha, aǵymdaǵy jyldyń qorytyndysy boıynsha jaqsy jáne qanaǵattanarlyq sapadaǵy jol úlesin 86%-dan 89%-ǵa deıin jetkizý kózdelip otyr.