Almaty ákimdigi tozyǵy jetken avtokólikterdi satyp alatyn bolady
ALMATY. KAZINFORM – Almatyda ekologııalyq jaǵdaıdy jaqsartýǵa baǵyttalǵan sheshimder talqylandy. Olardyń biri - eski kólikterdi satyp alý.
Almaty ákimdiginiń Ekologııa máseleleri jónindegi vedomstvoaralyq keńes otyrysynyń qorytyndysy boıynsha ekologııalyq klasy tómen eski avtokólikterdi satyp alyp, keıin olardy kádege jaratý úshin arnaıy kompanııa qurý máselesi pysyqtaldy.
Qala ákimdiginiń málimetinshe, bul jumys kásipkerlik jáne ınvestıtsııalar basqarmasymen jáne «Almaty» áleýmettik-kásipkerlik korporatsııasymen birlesip júzege asyrylady. Joba aıasynda avtoparkti jańartý tetikterin iske asyratyn enshiles uıym qurý kózdeledi.
- Joba sheńberinde ekologııalyq taza kólikterdi satyp alýǵa jeńildetilgen nesıeleý, lızıngtik baǵdarlamalar jáne Trade-In tetikterin engizý múmkindigi qarastyrylyp jatyr. Jobaǵa Astana Motors, Orbis jáne basqa da jergilikti avtokólik óndirýshilerin tartý josparlanyp otyr, - dep habarlady ákimdikten.
Eske salaıyq, buǵan deıin Almatyda 600-den astam avtokólik ekologııalyq normany buzǵanyn jazǵanbyz.
