Almaty ákimdigi eski avtobýstardy qaıta aýktsıonǵa shyǵardy
ALMATY. KAZINFORM — Almatyda paıdalaný merzimi aıaqtalǵan qoǵamdyq kólikter taǵy da satylymǵa shyǵaryldy.
Elektrondyq aýktsıon portalynda jarııalanǵan lot sıpattamasyna sáıkes, paıdalanýǵa jaramsyz jáne isten shyqqan dep tanylǵan 573 avtobýs satylymǵa shyǵaryldy.
Qoǵamdyq kólikter Almaty oblysyna qarasty Qaınazar aýylynda, «Darhan» jaýapkershiligi shekteýli seriktestigine tıesili turaqta tur.
Onyń jalpy quny 93 314 747 teńge, osylaısha bir avtobýstyń baǵasy 162 myń teńgeden aspaıdy.
Satýǵa shyǵarý týraly aqparat 2025 jyldyń 14 mamyrynda jarııalandy. Ótinimderdi qabyldaý 3 maýsymda saǵat 8:00–ge deıin ashyq bolady, al saýda-sattyqtyń ózi sol kúni saǵat 10:00–de bastalady.
— Kólikter tozyǵy jetkendikten jóndeý múmkin emes. Avtobýstar men trolleıbýstardaǵy ishi men oryndyqtary zaqymdalǵan nemese olar múlde joq, — delingen baǵalaý esebinde.
Aýktsıon sharttaryna sáıkes saýda-sattyqtyń jeńimpazy 60 kúntizbelik kún ishinde múlikti ózderi alyp ketýge mindetti. Qajet bolǵan jaǵdaıda avtobýstardy metall synyqtary kúıine deıin bólshekteý qoımadan tys jerde júzege asyrylýy tıis.
Aıta keteıik, bul avtobýstar buǵan deıin 2025 jyldyń 2 mamyrynda satylymǵa shyǵarylǵan, alaıda aýktsıon ótpedi.
Eske salaıyq, osydan eki jyl buryn áleýmettik jelide qala mańynda qańtarylyp turǵan 300 avtobýstyń vıdeosy taraǵan bolatyn.
Keıin Almaty ákimdigi «avtobýstar zıratyna» qatysty pikir bildirgen edi.