Almaty ákimdigi Sensata City jeri jol úshin alynyp jatyr degen aqparatty joqqa shyǵardy
ALMATY. KAZINFORM – Almaty ákimdigi Shuǵyla shaǵynaýdanyndaǵy Sensata City turǵyn úı kesheni turǵyndarynyń Ulyqbek kóshesin uzartý úshin jergilikti bılik turǵyn úı keshenine tıesili jerdi alyp jatyr degen shaǵymyna túsinik berdi.
Almaty ákimdiginiń málimetinshe, Naýryzbaı aýdany 2014 jyly qurylǵan. Sol kezde qalanyń Bas josparyna sáıkes ázirlengen egjeı-tegjeıli josparlaý jobasynda Ulyqbek kóshesin Momyshuly kóshesinen qala shekarasyna deıin uzartý qarastyrylǵan.
2021 jyly qalalyq Sáýlet jáne qala qurylysy basqarmasy Sensata City turǵyn úı kesheniniń qurylysyna arnalǵan jobalaý aldyndaǵy qujattardy bergen.
– Turǵyn úı kesheniniń eskızdik jobasy josparlanyp otyrǵan Ulyqbek kóshesiniń qyzyl syzyq shekarasyna deıingi qala qurylysy shekteýlerin eskere otyryp kelisilgen, ıaǵnı, turǵyn úı kesheniniń ońtústigindegi aýmaq bastapqyda jol salýǵa arnalǵan, sondyqtan ony ózge maqsatta paıdalaný qarastyrylmaǵan, - delingen habarlamada.
Ákimdik osyǵan baılanysty turǵyndardyń úı mańyndaǵy aýmaqqa tıesili jerlerdi ıelikten shyǵarý týraly málimdemesi shyndyqqa janaspaıtynyn habarlady.
– Bekitilgen eskızdik jobaǵa sáıkes «Sensata City» turǵyn úı kesheninde 334 avtoturaq orny qarastyrylǵan. Avtoturaq oryndarynyń jetispeýshiligine qatysty máseleni turǵyndar qurylys salýshy kompanııamen azamattyq-quqyqtyq tártipte sheshýi qajet, - delingen qala bıliginiń málimdesinde.
Eske salaıyq, buǵan deıin Almatyda JEO-1 men JEO-2 arasyndaǵy jylý magıstrali úshin jerler memleketke ótetinin habarlaǵan edik.
