Almaty ákimdigi Saıran kólindegi tyıymǵa qatysty túsinikteme berdi

ALMATY.KAZINFORM — Almatydaǵy Saıran sý qoımasynyń toltyrylýy ýaqytsha tehnıkalyq shara boldy. Sý sanıtarlyq-gıgıenalyq tekseristen ótken joq.

Qoǵamdyq keńistikterdi damytý basqarmasynyń málimetinshe, sý sanıtarlyq-gıgıenalyq tekseristen ótken joq. Sondyqtan QR «Halyqtyń sanıtarııalyq-epıdemıologııalyq salamattylyǵy» jáne «Qorshaǵan ortany qorǵaý týraly» zańdaryna sáıkes, sý aıdyndaryna azamattardyń kirýine shekteý qoıylady. Bul — adamdardyń ómiri men densaýlyǵyna tónetin qaýiptiń aldyn alý maqsatynda jasalady.

— Qazir Saıran kóliniń aýmaǵy qorshaldy, sebebi onda qurylys jáne ınjenerlik-tehnıkalyq jumystar áli de júrgizilip jatyr. Sý aıdyny zańda belgilengen tártippen paıdalanýǵa berilgen joq, — delingen basqarma habarlamasynda.

Ákimdik ókilderi kólge sý jiberý jumystary tek ýaqytsha iske qosý kezeńi aıasynda júrgizilgenin atap ótti. Qazir sý deńgeıi bekitilgen kestege sáıkes tómendetildi.

— Qazaqstan Respýblıkasynyń «Halyqtyń sanıtarııalyq-epıdemıologııalyq salamattylyǵy týraly» zańynyń 20-baby, 3-tarmaǵyna sáıkes, sý rekreatsııalyq maqsatta paıdalanýǵa jaramdy ekeni jóninde sanıtarlyq-epıdemıologııalyq qyzmettiń qorytyndysy alynǵanǵa deıin, shomylýǵa qatań tyıym salynady, — dep naqtylady ákimdikten.

Eske salaıyq, kúni keshe Saıran kólinde qaıǵyly jaǵdaı boldy. Respýblıkalyq jedel-qutqarý jasaǵynyń súńgýirleri sýdan eki adamnyń denesin alyp shyqty. Aldymen 17 jastaǵy jasóspirimniń denesi tabylsa, keıinirek — 1977 jyly týǵan er adam sýdan shyǵaryldy.

Jaqynda Almaty ákimi Darhan Satybaldy apparat keńesiniń otyrysynda Saıran kóliniń sanıtarııa jaǵdaıyna erekshe nazar aýdaryp, quqyqbuzýshylarǵa baqylaý júrgizip, qatań shara qoldanbaǵan basqarmalardy qatań synǵa alǵan bolatyn. 

Osyǵan deıin Saıran kólinde abattandyrý jumystary aıaqtalmaı jatyp, tazalyq máselesi týyndaǵany týraly jazǵanbyz.