Almaty ákimdigi Saıran kólindegi qalqymaly kópir qaıda ketkenin túsindirdi
ALMATY. KAZINFORM — Almatynyń Saıran kólindegi jańadan ornatylǵan kópirler bólshektelip, ýaqytsha alynyp tastaldy.
Áleýmettik jelide almatylyqtar jańarǵan Saıran kólindegi kópirlerdiń jabylǵanyn aıtyp, olardyń jaǵdaıyna alańdaýshylyq bildirgen.
Almaty ákimdiginiń málimetinshe, Saıran kóli aýmaǵyn abattandyrý jobasy aıasynda eki jaǵalaý arasyndaǵy qaýipsiz ári yńǵaıly ótýge múmkindik beriletin eki qalqymaly kópir ornatylǵan.
— Qazirgi ýaqytta qalqymaly kópirler Saıran kólindegi sý deńgeıiniń tómendeýine jáne qysqy kezeńge daıyndalý sharalaryna baılanysty ýaqytsha bólshekteldi. Kelesi jyldyń kókteminde sý qoımasynyń deńgeıi qaıta qalpyna kelgen soń, bul qurylymdar qaıta ornatylady, — dep habarlady ákimdikten.
Sonymen qatar mundaı jumys kópirlerdi tehnıkalyq turǵydan jaqsy jaǵdaıda saqtaý jáne olardyń qyzmet etý merzimin uzartý úshin jyl saıyn atqarylatyny atap ótildi.
Eske salaıyq, Saıran kólin abattandyrý jumystary 2023 jyly bastaldy. Qala ákimdigi aldymen jobanyń eskızderin usyndy.
Keıin Saıran sý qoımasynyń túbi 50 jylda alǵash ret tazartyldy. Mehanıkalyq tazalaý nátıjelerine 142 myń tekshe metr laı jáne 23 tonna turmystyq qoqys shyǵaryldy.
Bıyl abattandyrý jumystary aıaqtalmasa da, 2 maýsymnan bastap Saıran kóline sý toltyryla bastady.
Josparlanǵan jumystardyń ýaqtyly aıaqtalmaýyna baılanysty Almaty ákimdigi Saıran kólin abattandyrý jobasynyń bas merdigeri — «Pavlodarskıı rechnoı port» AQ qatysty sotqa talap aryz túsirdi.