Almaty ákimdigi saıabaq daýy boıynsha turǵyndardyń talabyna jaýap berdi
ASTANA. KAZINFORM — Almatynyń Samal-3 shaǵynaýdanynda saıabaq salý máselesi boıynsha turǵyndardyń ótinishine qala ákimdigi túsinikteme berdi. Buǵan deıin turǵyndar Meńdiqulov pen Qajymuqan kósheleriniń qıylysyndaǵy jer telimin memleket menshigine qaıtaryp, tolyqqandy saıabaq jasaýdy suraǵan edi.
Almaty ákimdiginiń málimetinshe, atalǵan aýmaqtaǵy 0,5 gektar jer ýchaskesi buǵan deıin jekemenshikte bolǵan. 2020 jyly bul aýmaqqa kóppáterli turǵyn úı kesheni men bıznes-ortalyq salýǵa jobalaý aldyndaǵy qujattama berilgen.
Alaıda turǵyndardyń pikirinen keıin ákimdik buryn berilgen ruqsat qujattarynyń kúshin joıǵan. Sonymen qatar ınvestormen kelisim jasalyp, jerdiń jartysy — 0,25 gektary qala menshigine tegin berilgen. Bul aýmaqta ınvestor óz qarajaty esebinen saıabaq aýmaǵyn abattandyrǵan.
— Keıin qala ákimdigi turǵyndardyń pikirin eskere otyryp, buryn berilgen ruqsat qujattarynyń kúshin joıdy. Sondaı-aq atalǵan jer ýchaskesin satyp alǵan ınvestormen kelisimge qol jetkizilip, ol ýchaskeniń jartysyn — 0,25 gektaryn qala menshigine óteýsiz berdi. Budan bólek, ınvestor óz qarajaty esebinen jaqyn mańdaǵy turǵyndardyń kelisimimen ázirlengen jobaǵa sáıkes saıabaq aýmaǵyn kóriktendirdi, — delingen habarlamada.
Al jerdiń qalǵan bóliginde «Shoqan Ýálıhanov atyndaǵy jekemenshik mektep» JShS jylyjaı salý jáne aýmaqty kóriktendirý jumystaryn júrgizip jatyr. Ákimdik bul jobada kúrdeli qurylys nysandary qarastyrylmaǵanyn atap ótti.
Qala bıliginiń málimetinshe, joba aıasynda kúrdeli qurylys nysandaryn salý kózdelmegen. Jer telimi jeke menshikte bolǵandyqtan jáne josparlanǵan jumystar onyń nysanaly maqsatyna sáıkes kelgendikten, jobalaý aldyndaǵy qujattardy joıýǵa zańdy negiz joq.
Eske salaıyq, buǵan deıin Almatyda bıyl qandaı jańa saıabaq salynatynyn jazǵan edik.
