Almaty ákimdigi merdigerlerge avans berýdi toqtatty
ALMATY. KAZINFORM — Almaty ákimi Darhan Satybaldy merdiger uıymdarǵa avanstyq tólem berýdi toqtatý týraly sheshim qabyldanǵanyn málimdedi. Budan bylaı kelisimshart boıynsha tólem tek naqty oryndalǵan jumystyń nátıjesi boıynsha beriledi.
Almaty ákiminiń aıtýynsha, jumys sapary men kúrdeli nysandardy tekserý barysynda birqatar kompanııanyń konkýrsta jeńiske jetip, avans alyp, ózine júktelgen jumystyń barlyǵyn qosalqy merdiger uıymdarǵa tolyqtaı berip otyrǵany anyqtalǵan. Bul rette olar jobalardy júzege asyrýǵa is júzinde qatyspaıdy.
— Jumysqa kirisken alǵashqy kúnnen bastap kóptegen kompanııanyń konkýrsqa qatysyp, avans alyp, keıin jumysty 100% qosalqy merdigerlerge tapsyratynyn kórdim. Ózderi basqa óńirlerde bolyp, nysanǵa is júzinde kelmeıdi, — dedi Darhan Satybaldy.
Ákim qazirgi ýaqytta konkýrstardyń jeńimpazy Qarjy mınıstrliginiń portalynda qoldanylatyn reıtıngtik-baldyq júıe arqyly aıqyndalatynyn eske saldy. Bul júıede jeńimpaz avtomatty túrde anyqtalady, onda adamı faktor joq.
— Kompanııalar konkýrstarda 30 paıyzdyq avans qarastyrylǵanyn kórip, shyn máninde tek sol qarajat úshin ǵana qatysady. Sonyń kesirinen jobalardy júzege asyrý merzimi sozylyp ketedi, al tapsyrys berýshi kompanııa quryltaıshylaryn basqa qalalardan izdeýge májbúr bolady, — dedi qala basshysy.
Osyǵan baılanysty Almaty ákimdigi avanstyq tólemnen bas tartý týraly sheshim qabyldady.
— Mundaı jaǵdaı endi qaıtalanbaýy úshin biz naqty sheshim qabyldadyq. Áýeli jumys oryndalady, sodan keıin ǵana tólem jasalady. Avanssyz, — dedi Almaty ákimi.
Eske salaıyq, buǵan deıin Almaty ákimdigi bıyl 30 jaýapsyz merdigerdi sotqa bergenin jazǵanbyz.