Almaty ákimdigi laı kóshkini saldarynan qaza tapqandardy jerleý rásimin uıymdastyrýǵa kómektesedi
ALMATY. KAZINFORM – Erbolat Dosaev laı kóshkini saldarynan qaza tapqandardyń týystary men jaqyndaryna kóńil aıtty jáne jerleý rásimin uıymdastyrýǵa kómek kórsetýdi tapsyrdy.
Tehnogendik sıpattaǵy laı kóshkini saldarynan qıraǵan úı astynan 1984 jyly týǵan er adamnyń, 1980 jylǵy áıeldiń jáne 2007 jyly týǵan egiz jasóspirimderdiń denesi tabyldy.
«Qutqarý qyzmeti Medeý aýdanyndaǵy qıraǵan úıde turǵan otbasy múshelerin izdeýdi aıaqtady. Qaıǵyly oqıǵa 4 adamnyń ómirin qıdy. Men qaza bolǵandardyń týystary men jaqyndarynyń qaıǵysyna ortaqpyn. Olarǵa shyn júrekten qatty qaıǵyryp, kóńil aıtamyn», - dedi Erbolat Dosaev.
Almaty ákiminiń tapsyrmasy boıynsha otbasynyń barlyq múshelerin jerleýdi uıymdastyrý úshin kómek kórsetiledi.
Qaza bolǵan otbasynyń úlken uly stýdent. Qazir ol elden tys jerde oqyp jatyr. Elge oralǵan soń oǵan bilim alýyna jáne ómir súrýine materıaldyq qoldaý kórsetiletin bolady.
Esterińizge sala keteıik, 8 aqpanda Medeý aýdanynyń «Taý Samaly» shaǵyn aýdanyndaǵy Olımpıskıı kóshesi boıynda tehnogendik sıpattaǵy topyraqtyń laılanýy saldarynan laı kóshkini júrdi.
Keıin Almaty qalasy Tótenshe jaǵdaılar departamenti men Respýblıkalyq jedel-qutqarý jasaǵynyń kúshteri úıindi astynan tórt adamnyń denesin tapty.
Olardyń barlyǵy bir otbasynyń múshesi - 1984 jyly týǵan er adam, 1980 jyly týǵan áıel jáne 2007 jylǵy egiz jasóspirim ul balalar.
