Almaty ákimdigi qurylysty ýaqytynda bitirmegen merdigerdi sotqa berdi
ALMATY. KAZINFORM — Almaty ákimdigi № 70 mekteptiń rekonstrýktsııa merzimin buzǵan merdiger uıymdy sotqa berdi.
Almaty ákimi Erbolat Dosaev Bostandyq aýdanynda ornalasqan № 70 mekteptiń kúrdeli jóndeý jáne seısmıkalyq nyǵaıtý jumysymen tanysty.
Almaty ákimdiginiń málimetinshe, shamamen 30 jyl buryn salynǵan 1250 oqýshyǵa arnalǵan mektepti jóndeý 2022 jyldyń qarashasynda bastalǵan.
Alaıda, shartta kózdelgen jyl ishinde merdiger uıym jumys kóleminiń tek 40%-yn ǵana oryndaǵan.
Sondyqtan qurylys basqarmasy merdigerge qatysty turaqsyzdyq aıyby men memlekettik bajdy óndirip alý týraly sotqa talap aryz berdi.
Osy jyldyń sáýir aıynda jumystar qaıta jandandy jáne búgingi kúni nysannyń daıyndyǵy 80% deıin jetkizildi: shatyr jabyny jabdyqtaldy, ınjenerlik kommýnıkatsııalar júrgizildi, ishki árleý aıaqtalýǵa jaqyn, aýmaqty abattandyrý jumystary júrip jatyr.
Megapolıs ákimi ishki árleý sapasyna qatysty eskertý jasady, kireberis aldynda nóser sýlaryn burýdy qarastyrýdy tapsyrdy.
«Bul mekteptiń rekonstrýktsııa jobasy 2019 jyly ázirlendi jáne onda biz engizip otyrǵan standarttar eskerilmegen. Sondyqtan mektepti sapaly jabdyqtaýǵa erekshe nazar aýdarý kerek. Barlyq jumystardy jańa oqý jyly bastalǵanǵa deıin aıaqtaý qajet», — dep atap ótti Erbolat Dosaev.
Almatyda «Jaıly mektep» ulttyq jobasy aıasynda 2025 jylǵa qaraı 37 100 oqýshyǵa arnalǵan jańa 22 mektep ashylady dep josparlanǵan.
Aıta keteıik, «Jaıly mektep» ulttyq jobasyn Qazaqstan Úkimeti 2022 jyly Prezıdenttiń «Ádil memleket. Birtutas ult. Gúldengen qoǵam» joldaýyn iske asyrý aıasynda qabyldady.
Jobanyń basty maqsaty — apatty nysandardy, úsh aýysymdy oqytýdy jáne orta bilim berý uıymdaryndaǵy oqýshy oryndarynyń tapshylyǵyn joıý.
Respýblıka boıynsha aldaǵy 2 jylda barlyǵy 401 mektep salý kózdelgen.
