Almaty ákimdigi kópqabatty avtoturaq jobasynan bas tartty

ALMATY. KAZINFORM — Almatyda kópqabatty avtoturaqtar salynyp, kólik aıaldaıtyn oryndar kóbeıe me? Kazinform tilshisi anyqtap kórdi.

Byltyr Almaty qalasy jol qozǵalysy jáne jolaýshylar kóligin uıymdastyrý basqarmasyna qarasty «Almaty parkıng» mekemesi «Kóktem-3» shaǵyn aýdanynda alǵashqy kópqabatty turaq salynatynyn habarlady. Al «Samal-1» shaǵyn aýdanynda mehanızatsııalanǵan avtoturaq uıymdastyrý josparlanyp otyrǵany belgili boldy.

Bir jyldan keıin mekemege qaıta júginip, qaladaǵy avtoturaq máselesin ishinara sheshýge kómektesetin eki jobanyń qandaı satyda ekenin suradyq. «Almaty parkıng» jaýaby sáıkes, «Samal-1» shaǵyn aýdanynda josparlanǵan aqyly turaq jobasy jergilikti turǵyndarmen aqyldasa kele toqtatylǵan. Al Bostandyq aýdany, «Kóktem-3» shaǵyn aýdanynda josparlanǵan 207 oryndyq kópqabatty turaq jobasy áli de qaralý ústinde.

— Odan bólek qalada kópqabatty avtoturaq salý josparda joq. Jańa jobalar paıda bolǵan jaǵdaıda qosymsha jarııalanady, — delingen jaýapta.

Aqyly avtoturaq sany men baǵasy

Jalpy qazir qalada 17 825 kommýnaldyq aqyly avtoturaq bar. Olardyń sany 2025 jyldyń ishinde kóbeımegen. Aýdandar bólinisinde:

* Almaly aýdany — 5363;
* Bostandyq aýdany — 787;
* Áýezov aýdany — 60;
* Medeý aýdany — 5102;
* Túrksib aýdany — 290;
* Jetisý aýdany — 3494;
* Alataý aýdany — 2637;
* Naýryzbaı aýdany — 92.

Kún saıyn aqyly turaqtardyń jumysyn arnaıy 15 kólik baqylaıdy.

— Kásiporyn qaladaǵy turaqtardy aqyly etýdi kózdemeıdi. Aqyly turaqtar kólik aǵyny men kóshe-jol jelisindegi ahýalǵa qaraı uıymdastyrylady, — dep túsindirdi mekeme.

«Almaty parkıng» málimetinshe, megapolıstegi tegin avtoturaqtardyń naqty sany belgisiz. Sebebi jol erejisi boıynsha toqtaýǵa tyıym salatyn jol belgisi bolmasa, kólikti joldyń oń boıyna qoıýǵa ruqsat etilgen.

Sondaı-aq mekeme ázirge turaq baǵasyn arttyrý josparda joq ekenin atap ótti

— Mamandar baǵany saraptaý jumysaryn júrgizip otyrady. Baǵany ózgertý josparlanǵan jaǵdaıda BAQ arqyly habarlanady, — dep naqtylady «Almaty parkıng» baspasóz qyzmeti.

Eske salaıyq, Saıran kóli mańynda avturaqtardyń azdyǵyna baılanysy jaýap bergen Almaty ákiminiń orynbasary Almashan Smatlaev qala turaq sanyn kerisinshe qysqartýǵa baǵdar alǵanyn aıtty.

Buǵan deıin Almaty turǵyndary Kóktóbedegi avtoturaq baǵasynyń kóterilgenine narazylyq bildirdi.