Almaty ákimdigi eski avtobýstardyń turaǵyna 196 mln teńge jumsaıdy
ALMATY. KAZINFORM – Almaty ákimdigi qoldanystan shyǵyp qalǵan qoǵamdyq kólikterdi saqtaýǵa arnalǵan jer telimin jalǵa alý úshin 196 mıllıon teńgege kelisimshart jasasty.
Memlekettik satyp alý saıtyndaǵy aqparatqa sáıkes, jer telimin «DARHAN» JShS jalǵa bergen. Jer teliminiń aýdany - 5 gektar, ol Almaty qalasynan 50 shaqyrym jerde, Almaty oblysyndaǵy Qaınazar aýylynda ornalasqan.
Jer telimin jalǵa alý qyzmeti boıynsha kelisimshart 2023 jyly jasalǵan. Ol boıynsha «Almatyelektrotrans» kompanııasy barlyq somany 2025 jyldyń 31 jeltoqsanyna deıin tóleýi tıis. Birinshi jylǵa bekitilgen soma – 7,84 mln teńge, ekinshi jylǵa – 94 mln teńge jáne 2025 jylǵa da dál sondaı tólem kózdelgen.
Tehnıkalyq tapsyrmaǵa sáıkes, jalǵa alynatyn aýmaq tikenek symmen qorshalǵan, qoıma ǵımarattary, kúzet beketteri, beınebaqylaýy, elektr jelisi bolýy kerek. Al kelisimshart talaptary boıynsha kompanııa paıdalanýǵa jaramsyz dep tanylǵan Yutong markaly avtobýstardy saqtaý úshin kúzeti bar jabdyqtalǵan alańdy qamtamasyz etýge mindetti.
Esepten shyǵarylǵan tehnıkanyń teńgerim ıesi — «Almatyelektrotrans» JShS.
Baǵalaý nátıjesi boıynsha esepten shyǵarylǵan avtobýstar men trolleıbýstar tehnıkalyq jáne ekonomıkalyq turǵydan qalpyna keltirýge jaramsyz. Sol sebepti jalǵa alynǵan alań bul avtobýstardy satylǵanǵa deıin ýaqytsha saqtaý orny retinde paıdalanylady.
Eske salaıyq, ótken aptada Almaty ákimdigi eski avtobýstardy qaıta aýktsıonǵa shyǵardy.
Buǵan deıin bul avtobýstar 2025 jyldyń 2 mamyrynda satylymǵa shyǵarylǵan, alaıda aýktsıon ótpedi.
Osydan eki jyl buryn áleýmettik jelide qala mańynda qańtarylyp turǵan 300 avtobýstyń vıdeosy taraǵan bolatyn.
Keıin Almaty ákimdigi «avtobýstar zıratyna» qatysty pikir bildirgen edi.