Almaty ákimdigi eski avtobýstardy 160 mıllıon teńgege satty
ALMATY. KAZINFORM – Elektrondy saýda alańy arqyly buzylǵan ári tehnıkalyq aqaýy bar 573 avtobýs satyldy.
Bul avtobýstardyń teńgerim ustaýshysy –«Almatyelektrotrans» JShS. Elektrondyq saýda saıtynda jarııalanǵan aqparatqa sáıkes, lottyń bastapqy baǵasy 93 mıllıon teńge bolǵan. Saýda nátıjesinde kólik quraldary 160 mıllıon 332 myń teńgege satylǵan.
Jeńimpaz týraly aqparat saıtta jarııalanbaǵan. Alaıda agenttik saýalyna jaýap bergen «Almatyelektrotrans» kompanııasy avtobýstardy «Arda Qurylys» JShS satyp alǵanyn habarlady.
Tehnıkalyq tapsyrma sharttaryna sáıkes, jeńimpaz múlikti 60 kún ishinde ózi alyp ketýge mindetti. Qajet bolǵan jaǵdaıda avtobýstardy bólshekteý olardy saqtaý aýmaǵynan tys jerlerde júrgizilýi tıis.
Esepten shyǵarylǵan avtobýstar Almaty oblysy, Qaınazar aýylynda, «Darhan» JShS aýmaǵynda saqtalyp tur.
Buǵan deıin Almaty ákimdigi eski avtobýstardyń turaǵyna 196 mln teńge jumsaıtynyn jazǵanbyz.
Eske salaıyq, bul avtobýstar 2025 jyldyń 2 mamyrynda satylymǵa shyǵarylǵan, alaıda aýktsıon ótpedi.
Odan keıin Almaty ákimdigi eski avtobýstardy qaıta aýktsıonǵa shyǵardy.
Eki jyl buryn áleýmettik jelide qala mańynda qańtarylyp turǵan 300 avtobýstyń vıdeosy taraǵan bolatyn. Keıin Almaty ákimdigi «avtobýstar zıratyna» qatysty pikir bildirdi.