Almaty ákimdigi burynǵy rezıdentsııa ornyna salynǵan skverdegi qorshaýlarǵa qatysty túsinik berdi
ALMATY. KAZINFORM – Almaty ákimdigi Prezıdenttiń burynǵy rezıdentsııasy ornynda ashylǵan jańa skverdi aınala qorshap turǵan temir qorshaýlarǵa qatysty túsinik berdi.
Qala turǵyndary skverge kirip-shyǵatyn kezde qolaısyzdyqtarǵa tap bolyp júrgenin aıtyp júr.
Skver men Tuńǵysh Prezıdent qorynyń saıabaǵyn bólip turǵan qorshaý halyqty aınalyp ótýge májbúrleıdi.
Qoǵamdyq keńistikterdi damytý basqarmasynyń málimetinshe, bul qorshaýlar qaýipsizdik talaptaryna sáıkes qoıylǵan.
— Joba aıasynda jańa qorshaý ornatý jaǵy qarastyrylmaǵan. Qazirgi qorshaýlar skver qurylysy bastalmaı turyp qoıylǵan. Olar jaıaý júrginshilerdiń kórshiles aýmaqtar arasynda qaýipsiz ári tártipti qozǵalysyn qamtamasyz etý úshin qaldyrylǵan, — delingen habarlamada.
Eske salaıyq, 2025 jylǵy qarasha aıynda Almatyda burynǵy Prezıdent rezıdentsııasynyń ornynda jańa skver ashylǵan edi. Bul az ýaqyt ishinde qala turǵyndarynyń jıi baratyn demalys aımaǵyna aınalyp úlgerdi. Buǵan deıin Kazinform fototilshisi jańasha keıipke engen qoǵamdyq keńistiktiń qalaı túrlengenin kórsetken edi.
Jańa skver Nazarbaev dańǵylynyń batysynda, Gandı kóshesiniń soltústiginde 4 gektardan astam aýmaqta ornalasqan. Qala turǵyndary munda túsirilgen foto jáne vıdeolaryn áleýmettik jelilerde jıi bólisip júr.
Skver aýmaǵyna 95 qylqan japyraqty, 228 japyraqty aǵash otyrǵyzylǵan. Qosymsha 469 qylqan japyraqty jáne 384 japyraqty buta otyrǵyzý jumystary jalǵasyp jatyr. Kópjyldyq ósimdikterden sándik kompozıtsııalar jasalǵan.
Jýyrda skverde tegin muz aıdyny ashyldy.