Almaty ákimdigi bılbordtardy ornalastyrýǵa 649 jer ýchaskesin zańsyz bergen
ASTANA. KAZINFORM — Almatyda bılbordtardy ornalastyrýǵa bólingen 649 jer ýchaskesi memleket menshigine qaıtaryldy.
Qala prokýratýrasynyń málimetinshe, 2004-2020 jyldar aralyǵynda Almaty ákimdigi jalpy paıdalanýdaǵy jerlerdi tıisti tizimnen zańsyz alyp tastap, bılbordtardy ornalastyrý jáne olarǵa qyzmet kórsetý úshin jer ýchaskelerin saýda-sattyqsyz jeke menshikke bergen.
Osylaısha, jer ýchaskeleri jer zańnamasynyń talaptaryn buza otyryp satylǵan.
Almaty prokýratýrasynyń usynýy negizinde Jer resýrstaryn basqarý departamenti sotqa talap-aryz bergen. Sot talap-aryzdy qanaǵattandyrdy.
— Nátıjesinde jalpy aýmaǵy 0,298 gektar bolatyn, joldyń bólingen beldeýinde ornalasqan jeke menshiktegi 649 jer ýchaskesi memleket menshigine qaıtaryldy, — delingen habarlamada.
Eske salaıyq, buǵan deıin Atyraý oblysynda 500 gektar aýyl sharýashylyǵy jeri memleket menshigine qaıtarylǵanyn habarlaǵanbyz.
