Almaty ákimdigi aýa sapasy týraly jeke datchıkter málimetine senbeýdi eskertti
ALMATY. KAZINFORM — Almaty ekologııa basqarmasy qaladaǵy aýa sapasyna qatysty jalǵyz resmı derek kózi Qazgıdromet beketteri ekenin málimdedi. Bul qyzmettiń barlyq qurylǵysy sertıfıkattalǵan, memlekettik tizimge engizilgen jáne mindetti tekserýden ótken.
Almaty ákimdiginiń habarlaýynsha, qala aýmaǵynda 16 statsıonarlyq baqylaý beketi ornatylǵan. Osy beketterdiń derekteri boıynsha aýa sapasynyń kórsetkishteri qoldanystaǵy sanıtarlyq-gıgıenalyq normatıvterge sáıkes qalyptastyrylady.
— Bul rette, túrli jekemenshik nemese kalıbrlenbegen qurylǵylar taratatyn aqparat resmı bolyp sanalmaıdy. Mundaı datchıkterdiń jaramdy sertıfıkaty joq, olar tekserýden ótpegen jáne memlekettik ólsheý quraldary tizimine engizilmegen. Sondyqtan mundaı quraldardan alynǵan aqparatty senimdi derek retinde qoldanýǵa bolmaıdy, — delingen habarlamada.
Qazgıdromet málimetinshe, bıyl 24-25 qarashada joǵary (10 ShRK-dan joǵary) jáne asa joǵary (50 ShRK-dan joǵary) lastaný deńgeıi tirkelmegen. Jekelegen beketterde keıbir zattar boıynsha 1,0-2,1 ShRK shamasynda bir rettik azdaǵan asý baıqaldy. Sınoptıkter qaladaǵy qazirgi tútindi aýa raıynyń qolaısyz meteorologııalyq jaǵdaılarymen qosa, antropogendik faktorlarmen de baılanystyryp otyr. Sonyń biri — ınversııa, ıaǵnı jyly aýa qabaty tómengi sýyq qabatty jaýyp, tik baǵytta aýa almasýyna kedergi keltiretin qubylys.
— Qarashanyń jelsiz aýa raıy, kópjyldyq baqylaýmen salystyrǵanda joǵary temperatýra, jaýyn-shashynnyń bolmaýy jáne jylytý maýsymynyń belsendiligi atmosferada zııandy zattardyń jınalýyna yqpal etedi. Lastaýshy kózder jeke turǵyn úıler, óndiristik nysandar jáne qala aýmaǵynda paıdalanylatyn shamamen bir mıllıonǵa jýyq avtokólik. Búginde Almatynyń aýa basseınin negizgi lastaýshy — avtokólik kóligi (shyǵaryndylardyń 60%-yna deıin). Qalǵan bóligi ónerkásiptik kásiporyndarǵa, jeke sektorǵa jáne qatty otyn paıdalanatyn monshaǵa tıesili, — dep habarlady ákimdik.
Eske salaıyq, «Qazgıdromet» RMK 27 qarashada Almatyda jáne taǵy alty qalada aýa sapasy nasharlaıtynyn boljaǵan edi.