Almaty ákimdigi Alataý aýdany turǵyndary nege bir táýlikten beri jaryqsyz otyrǵanyn túsindirdi
ALMATY. KAZINFORM - Alataý aýdanynda 13 qarasha keshke sóngen elektr energııasyna qatysty jańa málimet jarııalandy.
Aýdannyń birqatar shaǵynaýdanyn jaryqsyz qaldyrǵan apattyń naqty sebebi belgili boldy.
Ákimdiktiń habarlaýynsha, joǵary kerneýli jeliler «MAGNUM E-COMMERCE KAZAKHSTAN» JShS tapsyrysymen júrgizilgen gaz qubyryn kóldeneń baǵytta burǵylaý jumystary kezinde zaqymdalǵan. Bul jumystardy MP «GazEnerdjı» JShS oryndaǵan.
Apat 13 qarasha kúni shamamen saǵat 18:00-de tirkelgen. Túni boıy apattyq qyzmet kúsheıtilgen rejımde jumys istep, 00:15-te birinshi jeli qalpyna keltirildi, nátıjesinde birqatar tutynýshyǵa jaryq berildi.
14 qarasha tańerteń Saıaly, Aqbulaq, Zerdeli shaǵynaýdandarynda, sondaı-aq «Sofıa», «Arena Park» jáne ishinara «Aqkent», «Daraboz» turǵyn úı keshenderinde jaryq qaıta qosyldy.
Al qazirgi tańda Terekti (5 kóshe), Alǵabas (5 kóshe), Aqkenttegi 10 úı, Nurkenttegi 14 úı jaryqsyz otyr.
– Qazir zaqymdanǵan aýmaqta qazý jumystary júrip jatyr. Jer qazý aıaqtalǵan soń mamandar mýfta ornatyp, jelini tolyq qalpyna keltirýge kirisedi, - delingen habarlamada.
Ákimdik búgin saǵat 18:00-ge deıin elektr qýaty tolyq beriledi dep ýáde etti.
Eske salaıyq, buǵan deıin 13 qarasha kúni 110 kV № 124A jáne № 101A elektr jelileriniń apatty ajyratylýy tirkelgenin jazǵanbyz.
Oqıǵa saldarynan birqatar iri qosalqy stantsııa — PS-162A «Alǵabas», PS-169A «Aqbulaq» jáne PS-123A «ATETs-2» ýaqytsha toqtan ajyratyldy.