Almaty ákimdigi 1,5 jyl boıy ınvestorlardy gazǵa qospaı kelgen

Almaty prokýratýrasynyń front-ofısinde ótkizilgen kezdesýler barysynda ınvestorlardyń 1,5 jyl boıy gazben jabdyqtaý jelilerine qosyla almaǵany anyqtaldy, dep habarlaıdy Kazinform.

2022 jyly Almaty qalasynyń energetıka jáne sýmen jabdyqtaý basqarmasy ındýstrııalyq aımaqta gazben jabdyqtaý úshin magıstraldy ınjenerlik-kóliktik jelileriniń qurylysyn júrgizgen.

Oǵan birqatar ınvestorlardy qosý josparlanǵan.

Biraq ákimdik nysannyń «QazTransGaz Aımaq» AQ teńgerimine berilmegenine silteme jasaı otyryp, gazben jabdyqtaý jelilerine qosýdan bas tartqan.

«Taldaý nátıjesinde prokýratýra qadaǵalaý aktisin engizdi. Ony qaraǵannan keıin atalǵan magıstralǵa 124 mlrd teńgeden astam somaǵa ınvestıtsııalyq jobany iske asyryp jatqan, 3314 adamǵa jumys berip otyrǵan 26 ınvestor qosyldy. Sonymen birge zańnamanyń buzylýyna jol bergeni úshin basqarma bastyǵynyń orynbasary tártiptik jaýapkershilikke tartyldy» dep málimdedi prokýratýradan.