Almaty ákimi turǵyndardyń qar tazalaýǵa qatysty shaǵymyna jaýap berdi

ALMATY. KAZINFORM – Almaty ákimi Erbolat Dosaev turǵyndardyń keshe jaýǵan qardan keıin trotýarlar men aýlalardyń tazalanýyna qatysty shaǵymyna jaýap berdi.

Erbolat Dosaevpen kezdesý barysynda Túrksib aýdany turǵyndardyń biri jaýǵan qardan keıin qalada júrý múmkin emes ekenin aıtyp shaǵymdandy.

Aıtýynsha, shahardaǵy trotýarlar men aýla ishi qardan tazartylmaǵan nemese nashar tazalaǵan.

«Biz negizgi magıstraldi kóshelerdi tazaladyq, aıaldama mańy qalyń qardan arshyldy, trotýarlardaǵy jumystar aıaqtalýǵa jaqyn. Bul qalypty jaǵdaı. Men óz áriptesterimmen salystyratyn bolsam, olardyń jaǵdaıy áldeqaıda nashar. Almatyda bári keremet dep aıtpaımyz, qardan tazalanbaǵan aýlalar bar. Biraq men de qalany aralap, olardyń qalaı tazalanyp jatqanyn baqylap otyramyn. Búgin Súıinbaı kóshesimen júrip kele jatyp, joldyń tazalanǵanyn kórdim», - dep jaýap berdi Almaty ákimi Erbolat Dosaev.

Almaty ákimi keshegi jaýǵan qardan keıin kommýnaldyq qyzmetshiler barlyq kóshelerdi tazalap úlgermeı jatqanyn jáne bir túnde qaladan 10 myń tekshe metrden astam qar shyǵarylǵanyn atap ótti.