Almaty ákimi soǵys ardagerlerine Memleket basshysynyń quttyqtaýyn jetkizdi
ALMATY. KAZINFORM – Almaty ákimi Erbolat Dosaev 9 mamyr merekesi qarsańynda soǵys ardagerleriniń úıine baryp, Memleket basshysy Qasym-Jomart Toqaevtyń atynan quttyqtady.
Erbolat Dosaev Ekinshi dúnıejúzilik soǵysyna qatysqan 99 jastaǵy Ivan Matveevıch Begýnovqa bardy. 1925 jyly Ýkraınanyń Jıtomır qalasynda dúnıege kelgen. Aqtóbe oblysynda Keńes áskeri qatarynda qyzmet atqaryp, sol jerden maıdanǵa ketti. Ardager 228-shi gvardııalyq atqyshtar polkiniń quramynda soǵysty.
Pýlemetshi Ivan Matveevıch Eýropany azat etýge qatysty. Shabýyl kezinde ol pýlemetpen jaıaý áskerdiń alǵa jyljýyna jol ashyp, olarǵa pozıtsııalar arasyndaǵy qashyqtyqty eńserýge múmkindik jasaǵan jaýyngerlerdiń biri.
Batyldyǵy men erligi jáne sarbazdardyń rýhyn kótere bilgeni úshin Ivan Begýnov «Qyzyl Tý» ordenimen, «Erligi úshin», «Uly Otan soǵysyndaǵy Jeńisi úshin» medalimen jáne basqa da jaýyngerlik nagradalarmen marapattalǵan.
Soǵys ardageri bir ul, bir qyzynan 5 nemere, 11 shóbere súıip otyr.
«Ivan Matveevıch, sizdi kórgenime óte qýanyshtymyn. Kelesi jyly 100 jyldyq mereıtoıyńyzben quttyqtaımyn dep úmittenemin. Sizge bas ıip, taǵzym etip, Uly Jeńiske qosqan úlesińiz úshin alǵys aıtamyz. Ózińizdeı batyrmen maqtanamyz», - dedi Erbolat Dosaev.
Qala basshysy soǵys ardageri Darbala Ámirjanqyzy Jabataevany kele jatqan merekemen quttyqtap, erekshe iltıpat kórsetti. Erbolat Dosaev ardagerge soǵys kezindegi qajyrly eńbegi men qyzmeti úshin shyn júrekten alǵys aıtyp, zor densaýlyq tiledi. Almaty ákimi ardagerlerdiń ómiri erliktiń, boryshqa adaldyqtyń úlgisi ekenin atap ótti.
Qostanaı oblysynyń týmasy Darbala Jabataeva qysqa merzimdi kýrstan baılanysshy mamandyǵyn alǵasyn 1943 jyly 18 jasynda óz erkimen maıdanǵa attanǵan. Boıjetkenniń aldynda fashısterdiń sanyn, atys núktesin anyqtap, ol derekterdi jedel túrde ratsııa arqyly shtabqa habarlaý degen jaýyngerlik mindet turdy.
Shaıqastyń birinde Darbala Ámirjanqyzy jaraqat alyp, gospıtalda emdelip shyqqan soń 2-shi Belarýs maıdanynyń 4-shi tankke qarsy artıllerııalyq brıgadasyna jiberildi. Darbala Ámirjanqyzy Germanııada soǵysty aıaqtady.
Erligi men jaýyngerlik eńbegi úshin II dárejeli «Otan soǵysy» ordenimen, «Áskerı qyzmeti úshin», «Belarýsti azat etkeni úshin», «1941-1945 jyldardaǵy Uly Otan soǵysynda Germanııany jeńgeni úshin» jáne taǵy basqa orden jáne medaldarmen marapattaldy.
30 jyldan astam ýaqyt ardager jaýapty laýazymdarda jumys istedi, depýtat jáne Almaty qalalyq eńbek depýtattary keńesiniń atqarý komıtetiniń múshesi bolyp saılandy.
Qazir Darbala Ámirjanqyzy qyzymen birge turady. Týystary erekshe qurmet tutady, qamqorlyq kórsetedi. Darbala Ámirjanqyzy bes nemere men alty shóbereniń súıikti ájesi.
Ardagerlermen kezdesý úıde maıdangerdiń otbasynda, aǵaıyn-týystyń qasynda erekshe ystyq yqylaspen ótti.
Jeńis kúni qarsańynda ardagerlerge qala ákiminiń orynbasarlary, aýdan ákimderi de at basyn burdy. Kezdesý barysynda olar maıdangerlerdi merekemen quttyqtap, 9 mamyrda Jeńis kúnin toılaýǵa 28 gvardııashy-panfılovshylar atyndaǵy saıabaqqa shaqyrdy.