Almaty ákimi: senbilikter resmı sıpatta ótpeýi kerek
ALMATY. KAZINFORM – Almaty ákimi Darhan Satybaldy 2025 jyldyń III toqsanynda «Taza Qazaqstan» respýblıkalyq ekologııalyq aktsııasyn iske asyrý jóninde keńes ótkizdi. Jıynǵa aýdan ákimderi, qalalyq basqarma basshylary men jaýapty mekeme ókilderi qatysty.
Shahar basshysy «Taza Qazaqstan» aktsııasy erekshe baqylaýda ekenin jetikizdi.
– Bizdiń mindetimiz – bir rettik senbilikter ótkizý emes, kóshelerde, aýlalarda jáne halyqtyń sanasynda naqty ózgeristerge qol jetkizý, – dedi Darhan Satybaldy.
Keńeste «Taza Qazaqstan» aktsııasyna arnalǵan jeti negizgi baǵyt boıynsha 81 is-sharany qamtıtyn jospar men kúndelikti sektorlarǵa sáıkes keste tanystyryldy. Budan bólek, aqparattyq jumystardy joǵary deńgeıde júrgizýge erekshe kóńil bólindi. Aýqymdy medıanaýqan aıasynda urandar, beınerolıkter, aýdıoónimder ázirlenip,160 LED-ekranda, turǵyn úılerdiń lıftilerinde, metro men radıostantsııalarda, áleýmettik jelilerde kórsetilip jatyr.
Alataý jáne Naýryzbaı aýdanynyń ákimderi óz óńirlerinde júrgizilip jatqan tazalyq jumystary týraly esep berdi. Biri – aýlalardy tazalaý men kóshe abattandyrýyn jalǵastyryp jatsa, ekinshisi – beıbereket qoqys úıindileri men zańsyz jarnamaǵa qarsy kúresip jatyr.
Darhan Satybaldy áli kúnge deıin sýarý, kógaldandyrý, jaryqtandyrý, qoqys shyǵarý sııaqty máseleler sheshimin tappaǵanyn atap ótti.
– Saıabaqtarǵa, ózenderge, magıstraldarǵa, sýburqaqtarǵa ártúrli mekeme jaýap beredi. Sonyń saldarynan úılesimdilik joq. Áli kúnge deıin sýarý, kógaldandyrý, jaryqtandyrý, qoqys shyǵarý sııaqty máseleler sheshimin tappaǵan. Bul tek shetki aımaqtarǵa ǵana emes, qalanyń ortalyǵyna da qatysty. Mundaı bolmaýy kerek. Senbilikter resmı sıpatta ótpeýge tıis. Barlyq qyzmet qaǵaz júzinde emes, is júzinde qatysýy qajet, – dedi qala ákimi.
Keńes qorytyndysy boıynsha ákim Ekologııa basqarmasyna «Taza Qazaqstan» josparynyń oryndalýyn qatań baqylaýǵa alýdy, Qoǵamdyq damý basqarmasyna turǵyndardyń ekologııalyq mádenıetin arttyrýdy, al aýdan ákimderine barlyq sharany sapaly jáne ýaqytyly atqarýdy tapsyrdy.
Eske salaıyq, buǵan deıin Premer-mınıstr qoqys tastaıtyn adamdarǵa jazany qatańdatýdy tapsyrǵan bolatyn.