Almaty ákimi Prezıdentke qalany órkendetý týraly baıandady

ASTANA. KAZINFORM - Prezıdent Almaty qalasynyń ákimi Erbolat Dosaevty qabyldady. Memleket basshysyna Almatynyń bıylǵy qańtar-aqpan aıyndaǵy áleýmettik-ekonomıkalyq damýynyń aldyn ala qorytyndylary, qalany órkendetý perspektıvasy baıandaldy. Bul týraly Aqordanyń baspasóz qyzmeti habarlady. 

Erbolat Dosaevtyń aıtýynsha, atalǵan kezeńde qysqa merzimdi ekonomıkalyq ındıkator 7 paıyzǵa deıin artqan, jyl qorytyndysy boıynsha óńirlik jalpy ónim 6,4 paıyzǵa ósedi dep boljanyp otyr.

Prezıdent tapsyrmasyna sáıkes, Almatyda ekonomıkany ártaraptandyrý jáne ınvestıtsııa tartý jumystary jalǵasyp jatyr. Qala ákiminiń aıtýynsha, jyl sońyna deıin quny 450 mıllıard teńgeden astam qarajatqa 33 jańa ınvestıtsııalyq joba iske asyrylady. Bıyl jalpy ınvestıtsııa kólemi 2,2 trıllıon teńgege jetip, ótken jylmen salystyrǵanda 10 paıyzǵa artady.

Almaty ákimi Memleket basshysynyń bastamasymen qolǵa alynǵan, qorshaǵan ortaǵa uqypty qaraý mádenıetin qalyptastyratyn «Taza Qazaqstan» baǵdarlamasynyń oryndalýy jaıynda málimet berdi. Aýlalar, kóshe-jol jelileri men jasyl aımaqtardy keshendi túrde kútip, baptaý úshin úsh jyldyq kelisimshart tásili engizildi.

Prezıdent buǵan deıin shahardyń ekologııalyq jaǵdaıyn jaqsartý, jyl sońyna deıin qaladaǵy qoǵamdyq kólikterdi ekologııalyq talapqa tolyq saı etý, sondaı-aq Almatynyń kólik qurylymyn qalyptastyrý boıynsha tapsyrma bergen bolatyn. Kezdesýde osy jumystardyń nátıjeleri baıandaldy.

Qasym-Jomart Toqaev Erbolat Dosaevqa ekologııa máselesine den qoıyp, ınjenerlik jáne áleýmettik ınfraqurylymdy jańǵyrtý, jyl sońyna deıin sapaly syrtqy jaryqtandyrýmen qamtamasyz etý mindetin júktedi. Sondaı-aq Almatynyń ornyqty damýyna qatysty bergen tapsyrmalaryn muqııat oryndaý qajet ekenin aıtty.