Almaty ákimi Prezıdentke esep berdi

ASTANA. KAZINFORM - Prezıdent Qasym-Jomart Toqaev Almaty qalasynyń ákimi Erbolat Dosaevty qabyldady, dep habarlaıdy Aqordanyń baspasóz qyzmeti.

Memleket basshysyna Almatynyń bıylǵy qańtar-sáýir aılaryndaǵy áleýmettik-ekonomıkalyq damýynyń aldyn ala qorytyndysy jóninde esep berildi.

Prezıdentke osy kezeńde Almaty ekonomıkasynyń negizgi salalaryndaǵy ósim qarqyny joǵary bolǵany týraly baıandaldy. Atap aıtqanda, kólik qyzmetiniń kólemi 17,5 paıyzǵa, qurylys 5,7 paıyzǵa jáne baılanys baǵyty 4,4 paıyzǵa ósken. Megapolıs ekonomıkasyna 360 mıllıard teńge jeke ınvestıtsııa tartylǵan. Ósim 5,8 paıyzdy qurady.

Sonymen qatar Qasym-Jomart Toqaevqa bıyl sáýir aıynda Almatydaǵy jyldyq ınflıatsııa 9,1 paıyzǵa deıin báseńdegeni jaıynda málimet berildi. Jyl basynan beri 19,5 myń jumys orny ashylǵan. Bul jumyssyzdyq deńgeıin 4,7 paıyzǵa deıin tómendetýge múmkindik berdi.

Erbolat Dosaev shahardaǵy keıbir aýdandardy sýmen turaqty qamtamasyz etý úshin qabyldanyp jatqan sharalar týraly aıtty. Bıyl aqpan aıynda qalanyń joǵarǵy bóligin sýmen qamtý jónindegi rezerv shemasyn jasaý jumystary bastaldy. Qurylysty osy jyldyń 1 shildesine deıin aıaqtaý josparlanyp otyr. Al «Balqash» taza sý rezervýary paıdalanýǵa berilip, «ıÝbıleınyı», «Kamenskoe plato» jáne basqa da aýdandarǵa sý jetkizile bastady.

Budan bólek, Prezıdentke Almatynyń kólik qurylymyn qalyptastyrý aıasynda qolǵa alynǵan jobalar toptamasynyń júzege asyrylý barysy baıandaldy.

Kezdesý sońynda Qasym-Jomart Toqaev Almaty ekonomıkasyn ártaraptandyrý úshin ınvestıtsııa tartý, baǵa turaqtylyǵyn qamtamasyz etý jáne ınflıatsııa mólsherin odan ári tómendetý jumystaryn jalǵastyrýdy tapsyrdy. Sondaı-aq qalany sýmen qamtý máselesin aıryqsha baqylaýda ustaý qajet ekenin aıtty.