Almaty ákimi Oqýshylar saraıy men Almaty mýzeıiniń jumysymen tanysty
ASTANA. KAZINFORM – Almaty ákimi Darhan Satybaldy Oqýshylar saraıyna baryp, qalanyń eń iri qosymsha bilim berý ortalyǵynyń qyzmetimen tanysty.
1983 jyldan beri jumys isteıtin bul mekeme jyl saıyn 6-17 jas aralyǵyndaǵy balalarǵa sporttyq, kórkem-qoldanbaly, ǵylymı-tehnıkalyq, ekologııalyq, týrıstik-ólketaný, áleýmettik-pedagogıkalyq jáne mýzykalyq baǵyttar boıynsha baǵdarlama usynady. Búginde Oqýshylar saraıynda 15,1 myńnan astam bala bilim alyp júr, olardyń 7,9 myńnan astamy turaqty túrde qatysyp júr. 200-den astam muǵalim oqý kabıneti, zerthana, basseıni bar sport kesheni, planetarıı, observatorııa jáne shyǵarmashylyq stýdııada sabaq beredi.
Darhan Satybaldy ortalyqtyń ınfraqurylymymen tanysyp, klassıkalyq mýzyka jáne robototehnıka synyptaryn aralady. Almaty ákimi mundaı baǵyttardy damytý Memleket basshysy júktegen tapsyrmalardy iske asyrý aıasynda júrgizilip jatqanyn, al qosymsha bilim berý baǵdarlamalarynyń mazmuny men alýan túrliligi balalardyń jan-jaqty damýynyń mańyzdy bóligi ekenin atap ótti.
Barlyq bólme táýlik boıy beınebaqylaýmen, órt dabylymen jáne zamanaýı qaýipsizdik júıelerimen jabdyqtalǵan. Darhan Satybaldy qosymsha bilim berý nysandarynyń materıaldyq-tehnıkalyq bazasyn odan ári nyǵaıtý qajettigin aıtty.
Jumys sapary barysynda qala ákimi Almaty mýzeıine de baryp, ekspozıtsııamen qatar, mekemeniń qyzmetimen tanysty. 2002 jyly qurylǵan mýzeı búginde Jetisý óńiriniń tarıhı-mádenı murasynan syr shertetin qalanyń jetekshi mádenı ortalyqtarynyń biri. Mýzeı qorynda 40 myńǵa jýyq eksponat bar, olardyń qatarynda arheologııalyq oljalar, túrli dáýirlerdiń etnografııasy men turmys buıymdary, fotoderekter, beıneleý óneriniń týyndylary jáne Almaty qalasynyń myńjyldyq tarıhyn qamtıtyn biregeı toptamalar bar.
Ejelgi qonys kezeńinen qazirgi megapolıske deıingi ýaqytty qamtıtyn ekspozıtsııa 11 taqyryptyq zalda ornalasqan. Ákimge LED-ekran, aqparattyq qurylǵy, proektsııalyq júıe jáne ınteraktıvti keskindeme syndy mýzeıdiń zamanaýı mýltımedııalyq sheshimderi kórsetildi. Darhan Satybaldy tarıhı-mádenı murany saqtaý men mádenı nysandardyń qala turǵyndary men qonaqtary úshin qoljetimdiligin arttyrýdyń mańyzdylyǵyn atady.
