Almaty ákimi Lakı Kesoglýǵa I dárejeli «Barys» ordenin tabys etti

ALMATY. KAZINFORM – Almaty ákimi Erbolat Dosaev daryndy ánshige marapatty tabystap, el Prezıdentiniń atynan 85 jyldyq mereıtoıymen quttyqtady.

«Tabıǵı talant pen qajyrly eńbektiń arqasynda siz úlken shyǵarmashylyq joldan óttińiz, estradalyq sahnada kásibı deńgeıde tanylýǵa jáne tabysqa qol jetkizdińiz. Elimizde jáne shetelde kóptegen jankúıer sizdi joǵary oryndaý mádenıeti, mánerli lırıkalyq tenory, ártúrli janrlar men stıldegi ánderdiń mol repertýary úshin jaqsy kóredi jáne baǵalaıdy. Sizdiń ónerge qyzmet etýińiz, mádenı jáne rýhanı murany arttyrýǵa, daryndy jastardy tárbıeleýge qosqan zor úlesińiz úlken qurmetke laıyq», - delingen Qasym-Jomart Toqaevtyń quttyqtaýynda. 

Lakı (Panteleı) Kesoglý 1939 jyly týǵan, Qurmanǵazy atyndaǵy Memlekettik konservatorııany «Opera, kontserttik ánshi, oqytýshy» mamandyǵy boıynsha bitirgen.

Eńbek jolyn 1967 jyly konservatorııa janyndaǵy opera stýdııasynyń solısi qyzmetinen bastaǵan. 1970 jyly Máskeýde ótken Búkilodaqtyq estrada artısterdiń baıqaýynda dıplomant boldy. 1972 jyldan 1998 jylǵa deıin Qazaq televızııasy men radıosy estradalyq-sımfonııalyq orkestriniń jetekshi solısi bolyp jumys istedi. Osy kezeńde ol Máskeýdegi Odaqtar úıiniń Kolonna zalynda dırıjerler ıÝ. Sılantev, v. Lıýdvıkovskıı, B. Karamyshev, G. Garanıan, ıÝ.Mıhaılov, V. Meşerınniń jetekshiligimen Búkilodaqtyq radıonyń úzdik orkestrlerimen birge Kreml Sezder saraıynda, «Reseı» kontsert zalynda óner kórsetti.

Lakı Kesoglý óziniń mansabynda keńestik jáne grek ánderi bar birneshe grammofon kúıtabaqty, sondaı-aq «Kaprıznaıa pogoda» jazbasyn jazdy, onda tanymal qazaqstandyq avtorlar Tiles Qajyǵalıev, Almas Serkebaev, Edýard Bogýshevskıı jáne t.b. ánin oryndady.

Sonymen qatar, Lakı Konstantınovıch Qazaqstan metsenattarynyń «Tarlan» joǵary mýzykalyq syılyǵynyń ıegeri, II dárejeli «Dostyq» (2004 j.) jáne «Parasat» (2019 j.) ordenderimen marapattalǵan.

Osyǵan deıin QR Prezıdenti Lakı Kesoglýdi І dárejeli «Barys» ordenimen nagradtaǵan edi.