Almaty ákimi Belsendi uzaq ómir súrý ortalyqtarynyń sanyn kóbeıtýdi tapsyrdy
ALMATY. KAZINFORM – Almaty ákimi Erbolat Dosaev halyqaralyq qarttar kúninde Almaty keńesiniń tóraǵasy Ahan Bıjanov bastaǵan qalalyq ardagerler keńesiniń múshelerimen kezdesti.
«Bizdiń qoǵamymyzda úlkenge qurmet kórsetý – ulttyq sana-sezimniń negizinde jatqan erekshe dástúr. Sizder bizdiń tarıhymyzdyń saqtaýshylary, erekshe ómirlik tájirıbe men sarqylmas danalyqtyń ıesisizder. Qalamyzdyń gúldenýine qosqan úlesterińiz úshin alǵys aıtamyn», - dedi Erbolat Dosaev.
Kezdesý barysynda qatysýshylar ákimniń bastamasymen bıyl shilde aıynda iske qosylǵan «Altyn jas» atty aǵa býyn ókilderine arnalǵan jumyspen qamtý baǵdarlamasynyń tıimdiligin tilge tıek etti. Qazir 400 almatylyq zeınetker jumys taýyp, áleýetin júzege asyryp otyr. Aıta keterligi, jalaqynyń 50%-y jergilikti bıýdjetten sýbsıdııalanady.
Almaty ardagerler keńesiniń tóraǵasy Ahan Bıjanovtyń aıtýynsha, bıyldyń ózinde áleýmettik qoldaý 124 myń adamdy qamtydy.
Egde jastaǵy adamdardy sanatorlyq-saýyqtyrý emimen qamtamasyz etý jalǵasýda. Jyl basynan beri bul áleýmettik kómekti 2 myńǵa jýyq zeınetker paıdalandy.
Qala ákiminiń tapsyrmasymen halyqtyń áleýmettik osal sanattaryna kommýnaldyq qyzmet tarıfteriniń ósýine baılanysty ótemaqy tóleý taǵy bir jylǵa uzartyldy. Byltyr 5,7 mlrd teńge kólemindegi aı saıynǵy áleýmettik tólem 140 myńnan astam HÁOT adamdarǵa berildi.
Ardagerler keńesiniń músheleri qala basshylyǵyna ótken kezdesý barysynda kóterilgen máselelerdi sheshkeni úshin alǵys aıtty. Atap aıtqanda, aýdandyq ardagerler uıymdaryn qyzmettik avtokólikpen qamtamasyz etý máselesi sheshimin tapty, ardagerlerdi qoldaý jobasyna qarjy bólindi.
Bıyl Almatyda qosymsha úsh Belsendi uzaq ómir súrý ortalyǵy ashyldy. 2022 jyldan bastap qalada barlyǵy 15 ortalyq quryldy. Jobalar zeınetkerlerdi mádenı, shyǵarmashylyq, sporttyq jáne iskerlik ómirge tartýǵa baǵyttalǵan, bul olardyń fızıkalyq jáne psıhıkalyq densaýlyǵyn jaqsartýǵa septigin tıgizedi. Jyl basynan beri ortalyqqa kelýshilerge 500 myńǵa jýyq túrli qyzmet kórsetildi.
Kezdesý qorytyndysy boıynsha Almaty ákimi Belsendi uzaq ómir súrý ortalyqtarynyń sanyn qaladaǵy ár aýdanda ekige jetkizýdi jáne kórsetiletin qyzmetterdiń sapasy men úzdiksizdigin qamtamasyz etýdi tapsyrdy.
