Almaty ákimi áıelderge Prezıdent atynan memlekettik nagradalar tabys etti
ALMATY. KAZINFORM – Almaty ákimi Erbolat Dosaev 8 naýryz – Halyqaralyq áıelder kúni qarsańynda Memleket basshysynyń atynan memlekettik nagradalardy saltanatty túrde tabys etti.
Marapattalǵandar tiziminde eńbegimen, eren isimen qala men eldiń damýyna úles qosatyn almatylyq áıelder bar.
Prezıdenttiń jarlyǵymen bilim berý júıesin damytýǵa qosqan eleýli úlesi úshin «Qurmet» ordenimen eńbek ardageri Zaıda Jaısanova marapattaldy. Onyń kásibı qyzmeti qazaq mektepterin dáripteýmen, nemis tilin oqytý ádistemesin jetildirýmen jáne bilim berý salasyndaǵy halyqaralyq yntymaqtastyqty nyǵaıtýmen baılanysty.
Sportty damytýǵa qosqan úlesi úshin «Qurmet» ordenimen eńbek ardageri Tatıana Lesova da marapattaldy. Ol jeńil atletıkadan KSRO-nyń eńbek sińirgen sport sheberi, joǵary biliktilik sanatyndaǵy jattyqtyrýshy, KSRO chempıony jáne Olımpıada oıyndarynyń júldegeri.
Memleket basshysy bıyl jarııalaǵan Jumysshy mamandyqtar jyly «Eren eńbegi úshin» medalimen «Almatjylýkommýnenergo» JShS qazandyq sharýashylyǵyn paıdalaný aýdany №6 ýchaskesiniń hımııalyq sý tazartý apparatshysy Olga Drofa marapattaldy. Ol kásiporynda 1996 jyldyń qarasha aıynan bastap jumys isteıdi jáne óziniń eńbek jolyn búgingi kúnge deıin jalǵastyryp jatyr.
«Eren eńbegi úshin» medalimen «ALMATY MAI» JShS shıkizatty qabyldaý jáne shrotty túıirshikteý tsehynyń bastyǵy Irına Hasanova marapattaldy.
1997 jyldan bastap «Úmit» sańyraý múgedekterdi qoldaý ortalyq» qoǵamdyq qoryn basqaýshy Amanbıke Erǵalıeva «Shapaǵat» medalimen marapattaldy. Onyń áleýmettik saladaǵy jumys ótili 30 jyldan asady.
Eske salaıyq, búgin Memleket basshysy Qasym-Jomart Toqaevtyń qatysýymen 8 naýryz – Halyqaralyq áıelder kúnine arnalǵan saltanatty jıyn ótti.