Almaty ákimi Ál-Farabı dańǵylynda bolǵan jol apaty týraly pikir bildirdi
ALMATY. KAZINFORM – Almaty qalasynyń ákimi Darhan Satybaldy áleýmettik jelidegi paraqshasynda 3 adamnyń ómirin qıǵan jol apaty jaıly pikir bildirdi.
- Ál-Farabı dańǵylynda adam shyǵynyna ákelgen jol apaty – qala úshin orny tolmas qasiret. Qaza bolǵandardyń aǵaıyn-týystary men jaqyndaryna kóńil aıtamyn. Almatyda kólik sany kún sanap artyp, joldarǵa túsetin salmaq kóbeıip keledi. Júrginshiler men júrgizýshilerdiń qaýipsizdigin qamtamasyz etý baǵytyndaǵy baqylaýdy kúsheıtip, júıeli jumysty jalǵastyramyz, - dep jazdy ákim.
Sonymen qatar Darhan Satybaldy polıtsııaǵa kólikti turaqqa durys qoımaýdan bastap óreskel zań buzýshylyqtarǵa deıin qatań shara qabyldaýdy tapsyrǵanyn atap ótti.
Onyń aıtýynsha, bıyl jalpy uzyndyǵy 290,2 shaqyrym bolatyn 360 kóshede, onyń ishinde 17 magıstraldy kóshe ortasha jóndeýden ótedi. Qazir jol jabynyndaǵy aqaýlardy joıý, lıýkter men jańbyr sýyn qabyldaıtyn qudyqtardyń shógýin qalpyna keltirý jumystary bastaldy.
- Merdiger uıymdar jumystyń sapasyn qamtamasyz etip, belgilengen merzimdi qatań saqtaýǵa tıis. Bul másele jeke baqylaýymda, - delingen ákim jazbasynda.
Eske salaıyq, 21 naýryzǵa qaraǵan túni Zeekr kóliginiń júrgizýshisi Ál-Farabı dańǵylynyń boıymen kele jatyp, qarsy qozǵalys jolaǵyna shyǵyp ketip, Mercedes avtokóligimen soqtyǵysqan. Jol apaty saldarynan Mercedes kóliginiń júrgizýshisi men eki jolaýshysy oqıǵa ornynda qaza tapty.
Atalǵan derek boıynsha QR Qylmystyq kodeksiniń 345-baby 4-bóligi boıynsha qylmystyq is qozǵaldy. Bul bap boıynsha 10 jylǵa deıin bas bostandyǵynan aıyrý jazasy qarastyrylǵan.
Keıin Almaty qalasy polıtsııa departamentiniń bastyǵy Aıdyn Qabduldınov rezonans týdyrǵan jol-kólik oqıǵasyna qatysty pikir bildirdi.
Іshki ister mınıstri Erjan Sadenov Almatydaǵy jol apatynan keıin birqatar basshy qyzmetinen bosatylǵanyn málimdedi.
