Almaty aglomeratsııasyn basqarý júıesi qaıta qaralýy múmkin

QONAEV. KAZINFORM — Almaty aglomeratsııasyn damytý jumystaryn tek sáýlet jáne qala qurylysy basqarmasyna júkteý jetkiliksiz. Bul týraly «AMANAT» partııasynyń Almaty oblystyq fılıaly janyndaǵy «Óńirlik damý» jónindegi keńes otyrysynda aıtyldy.

Keńes tóraǵasy Mahabbat Bıgeldıevtiń sózinshe, qazir Almaty mańyndaǵy eldi mekenderde halyq sany artyp, jańa qurylys belsendi júrip jatyr. Alaıda bul aýmaqtarda jol, sý, jaryq, ınternet, mektep, emhana, qoǵamdyq kólik sekildi ómirlik mańyzy bar ınfraqurylymdar qajetti deńgeıde damymaı keledi. Máseleni tek josparlaý nemese qurylys salasymen sheshý múmkin bolmaı otyr.

— Biz aglomeratsııa máselesin tek qurylys pen bas jospar sheńberinde qarap kelemiz. Biraq bul – júıeli ári salaaralyq sıpattaǵy jumys. Munda densaýlyq saqtaý, bilim berý, ınjenerlik ınfraqurylym, kólik, baılanys sııaqty túrli basqarmalardyń mindetteri qıylysady. Sondyqtan bul jumysty úılestiretin naqty organ qajet, – dedi keńes tóraǵasy.

Osyǵan baılanysty, keńes músheleri aglomeratsııalyq jobalardy úılestiretin jaýapty qurylym retinde Almaty oblysynyń ekonomıka jáne bıýdjettik josparlaý basqarmasyn qarastyrýdy usyndy. Bul basqarma túrli saladaǵy basqarmalarmen jumys istep, qajetti derekterdi jınaqtap, qarjylandyrýdy josparlaý jáne iske asyrý tetikterin bir arnaǵa toǵystyra alady.

Usynysty keńes músheleri qoldap, bul máseleni oblys ákimdigi deńgeıinde qaraý qajet ekenin jetkizdi.

Resmı derekke sáıkes, Almaty aglomeratsııasynyń quramyna Almaty qalasymen qatar, Qonaev qalasy, Talǵar, Іle, Qarasaı jáne Jambyl aýdandary kiredi. Barlyǵy – 31 aýyldyq okrýg pen 98 eldi meken. Halyq sany 3,4 mıllıonnan asady.

— 2024–2028 jyldarǵa arnalǵan keshendi damý jospary aıasynda Almaty aglomeratsııasynda jalpy quny 3,37 trln teńgeni quraıtyn 134 joba júzege asyrylmaq. Onyń 78-i – Almaty oblysy aýmaǵynda. Bul – ınjenerlik jáne áleýmettik ınfraqurylymdy jańartýdan bastap, kólik, ekologııa, energetıka jáne tsıfrlyq ınfraqurylymǵa deıingi aýqymdy sharalardy qamtıtyn keshen,— dedi ol.

Keńes músheleri, mundaı kólemdegi jobalardy sátti oryndaý úshin salaaralyq úılestirý kúsheıtilýi tıis ekenin jetkizdi. Áıtpese, jergilikti deńgeıde bastalǵan jumystar bir-birimen baılanyspaı, keshigýler men júıesizdikke urynýy múmkin.

Eske salaıyq, buǵan deıin Almaty oblysyndaǵy Esik qalasynyń shekarasy eki ese ulǵaıǵanyn jazǵanbyz.

Sondaı-aq mamandar Almaty qalasyna aldaǵy jyldary Almaty oblysynan jańa aýmaqty qosý josparda joq ekenin atqan bolatyn.