Almaty-3 vokzalynyń negizgi qujaty daıyn: qurylys qashan bastalady
ALMATY. KAZINFORM – Almatyda úshinshi temirjol vokzalynyń qurylysyna daıyndyq jumystary júrip jatyr.
Kazinform agenttigi jol ınfraqurylymyn damytý basqarmasynan jobanyń qandaı satyda ekenin surady. Oǵan jaýap bergen vedomstvo basshysy Oljas Shabdanov Almaty-3 vokzalynyń tehnıkalyq-ekonomıkalyq negizdemesi (TEN) qazirgi ýaqytta memlekettik saraptamadan ótip jatqanyn aıtty.
— «Almaty-3» vokzalyn salý» nysany boıynsha tehnıkalyq-ekonomıkalyq negizdeme ázirlendi. Qazirgi ýaqytta bul qujat tıisti qorytyndy alý úshin memlekettik saraptamaǵa joldandy, — delingen resmı jaýapta.
Jańa nysannyń naqty quny áli anyqtalmaǵan. Oljas Shabdanovtyń aıtýynsha, nysan qurylysynyń túpkilikti quny TEN boıynsha memlekettik saraptamanyń oń qorytyndysy alynǵannan keıin belgili bolady.
Bıyl naýryz aıynda Boraldaı-Aqseńgir aralyǵynda Almaty-3 vokzalyn salý úshin Alataý aýdanynda ornalasqan 52 jer ýchaskesin memleket muqtajyna alý rásimi bastaldy. Májbúrlep ıelikten shyǵarý merzimi 2028 jyldyń 31 jeltoqsanyna deıin belgilengen.
— Almaty qalasynyń jer qatynastary basqarmasy atalǵan tehnıkalyq-ekonomıkalyq negizdemeni iske asyrý sheńberinde memleket muqtajy úshin jer telimderin satyp alý rásimderin bastady, — dep atap ótti Oljas Shabdanov.
Eske salaıyq, qazir Almaty-1 vokzalynda jańǵyrtý jumystary júrip jatyr.
