Almaty 2026 jyly TMD-nyń sport astanasy mártebesine ıe boldy
ASTANA. KAZINFORM — Búgin Ázerbaıjan Respýblıkasynyń Gıandja qalasynda TMD-ǵa múshe memleketterdiń Dene shynyqtyrý jáne sport salasyndaǵy yntymaqtastyq jónindegi Keńesiniń otyrysy ótti, dep habarlaıdy Týrızm jáne sport mınıstrliginiń baspasóz qyzmeti.
Іs-sharaǵa Ázerbaıjan Respýblıkasynyń Jastar jáne sport mınıstri Farıd Gaıbov, Belarýs, Qyrǵyzstan, Reseı Federatsııasy, Tájikstan, Túrikmenstan, Ózbekstan sport vedomstvolarynyń basshylary, sondaı-aq TMD Atqarýshy komıtetiniń ókilderi qatysty. Otyrys qorytyndysy boıynsha odan ári ózara is-qımyldyń basym baǵyttaryn aıqyndaıtyn qorytyndy hattamaǵa qol qoıyldy.
TMD Syrtqy ister mınıstrleri keńesiniń 2024 jylǵy 12 sáýirdegi sheshimimen Almaty qalasy 2026 jyly TMD-nyń sport astanasy bolyp jarııalandy.
— Almaty sport astanasy mártebesin mártebesin laıyqty atqarýǵa daıyn. Qalada damyǵan sporttyq ınfraqurylym, halyqaralyq jarystardy ótkizý tájirıbesi jáne buqaralyq sporttyń ornyqty dástúri bar. Qazirgi tańda Almatyda 3 000-nan astam sport nysany jumys isteıdi, onyń ishinde kópsalaly «Almaty Arena», «Halyq Arena» keshenderi jáne halyqaralyq deńgeıdegi «Suńqar» shańǵy tramplınderi bar, — dedi QR TSM Sport jáne dene shynyqtyrý isteri komıteti tóraǵasynyń orynbasary Amanbaı Nurmuhanbetov.
«TMD sport astanalary» memleketaralyq baǵdarlamasy aıasynda halyqaralyq forýmdar, jarystar, jastar jáne ınklıýzıvti bastamalardy ótkizý josparlanyp otyr.
Otyrys barysynda birlesken jobalardy iske asyrý, sporttyq is-sharalar uıymdastyrý jáne TMD elderiniń salalyq vedomstvolary arasyndaǵy kópjaqty baılanysty nyǵaıtý áleýeti talqylandy.
Eske sala keteıik, 28 qyrkúıek pen 8 qazan aralyǵynda Ázerbaıjan Respýblıkasynda TMD-nyń III Oıyndary ótip jatyr. Ulttyq qurama 18 sport túri boıynsha, onyń ishinde 16 olımpıadalyq jáne 2 olımpıadalyq emes túrden baq synaıdy.
Osydan buryn ÝEFA reıtınginde kósh bastap turǵan «Real Madrıd» klýbynyń oıynshylary Almatynyń Ortalyq stadıonynda jattyǵý jasaǵanyn jazǵanbyz.